Вести › Набрзинка

Трамп ја прогласи Антифа за „домашна терористичка група“

23 септември 2025

Претседателот Доналд Трамп потпиша извршна наредба со која го прогласува левичарското антифашистичко движење Антифа за „домашна терористичка организација“.
Со наредбата се бара од сите релевантни одделенија и агенции да ги истражат, попречат и демонтираат сите нелегални операции - особено оние што вклучуваат терористички акции - спроведени од Антифа или во нејзино име. Се одобруваат и истражни и обвинителски мерки против лица што ја финансираат или ѝ обезбедуваат материјална поддршка на Антифа.
„Антифа регрутира, обучува и радикализира млади Американци да се вклучат во насилство и потиснување на политичката активност, а потоа користи сложени средства и механизми за да ги заштити идентитетите на оперативците и да ги прикрие своите извори на финансирање... Овој организиран напор дизајниран да постигне политички цели преку принуда и заплашување е домашен тероризам“, се наведува во наредбата.
САД немаат посебен закон за домашен тероризам. Со наредбата не се предвидуваат замрзнување на средства и сметки на членови на Антифа - мерка што важи за групите од списокот терористички организации на Стејт департментот.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор