Вести › Набрзинка

Трамп: Бед Бани на Супербоул беше шамар за Америка

9 февруари 2026

„Апсолутно ужасно“ гласеше рецензијата на американскиот претседател за настапот на полувремето на овогодинешното финале на американскиот фудбал на порториканскиот музичар кој зборува исклучиво шпански.
„Никој ни збор не разбира што кажува овој човек, а танцувањето беше одвратно, особено за малите деца што гледаат од САД и од целиот свет“, пиша Трамп на својата мрежа, мислејќи на тоа што танчерките тверкаа а главниот јунак знаеше да се заџапа за меѓуножје (мислиш Мајкл Џексон за јајца го фатил).
„Немаше никаква логика, беше навреда за грандиозноста на Америка и не ги претставува нашите стандарди за успех, креативност или извонредност“, пиша големиот естета.
Бед Бани, чие вистинско име е Бенито Антонио Мартинез Оказио во еден момент извика „Господ да ја благослови Америка“, но потоа прецизираше што подразбира под тоа, редејќи ги поименично сите држави од Јужна и Северна Америка.
Музиката на Бед Бани - за нас, нормално - е бљак, но настапот, концептот и сè останато беше спектакуларен. Можете да го видите - ОВДЕ.
Истовремено беше организирано и алтернативно „патриотско“ Супербоул полувреме, со Кид Рок како хедлајнер. Сега го ругаат дека само отворал уста на матрица.
Ова полувреме организирано во чест на убиениот Чарли Кирк успеа да собере пет милиони гледачи, главно од оние кои беа револтирани од изборот на Бед Бани. Официјалниот настан имаше 130 милиони гледачи.

извор

Иран ќе наплаќа „осигурување“ за премин на Ормускиот проток

18 мај 2026

Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
„Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.

извор

Путин им нуди руски пасоши на жителите од регионот отцепен од Молдавија

18 мај 2026

Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
„Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.

извор