Вести › Набрзинка

Словачка ќе им точи поскап дизел на странци

19 март 2026

Словачка им дозволи на бензинските пумпи да ја ограничат продажбата на дизел и да го продаваат по повисоки цени за странци за да се спречи „дизел-туризмот“.
Цените на дизелот за автомобили со странски регистерски таблички ќе се утврдува врз основа на просекот на цените во соседните Чешка, Австрија и Полска. Мерката ќе биде на сила 30 дена и нема да важи за бензините.
„Ограничувањата се неопходни за да се спречи порастот на продажбата на дизел на луѓе од Полска, кои доаѓаат за да точат поевтино гориво од Словачка. Десетици бензински пумпи во северна Словачка буквално пресушија“, изјави премиерот Роберт Фицо.
Цената на дизелот во Словачка на 16 март беше 1,48 евра за литар, а во Полска 1,74 евра.
Словачка е погодена од криза со горивата поради оштетувањето на нафтоводот „Дружба“ преку кој добива нафта од Русија. Фицо ја обвинува Украина дека не го поправа нафтоводот за да го заостри политичкиот притисок врз Словачка. Војната во Иран ја зголеми глобалната побарувачка на нафта и гас и уште повеќе ја продлабочи кризата.

извор

Бес во Израел заради прекинот на огнот

8 април 2026

„Ова е политички и стратешки пораз! Во целата наша историја, таква катастрофа никогаш не се случила“, го коментира примирјето шефот на израелската опозиција, Јаир Лапид.
Вели дека Бенјамин Нетанјаху не исполнил ниту една цел која си ја имал зададено иако војската направила сè што барал.
Лапид потсетува дека Израел не ни бил вклучен во преговорите и дека на државата „ќе ѝ требаат години за да се опорави од политичката и стратешката штета“ што Нетанјаху ја предизвика со својата ароганција, невнимание и недостаток на стратешко планирање.
Претседателот на партијата Израел Бејтену, Авигдор Либерман, оцени дека ваков договор со Иран значи дека Израел во иднина ќе мора повторно да влезе во конфликт, под потешки услови и по повисока цена.

извор

Одбиен предлогот за ограничување на учеството во странски војни

8 април 2026

Предлогот на пратеничката група на Левица за измени и дополнувања на Законот за одбрана не доби поддршка во Собранието, откако пратениците од СДСМ гласаа против, а пратениците од ВМРО-ДПМНЕ не гласаа.
„Собранието треба да ја ограничи Владата, така што армијата ќе се користи само во мисии со меѓународен легитимитет, одобрени од Советот за безбедност на Обединетите нации“, истакна Реџеп Исмаил.
„Со ова се елиминира можноста македонскиот војник да биде испраќан во геополитички лавиринти без јасен меѓународно-правен легитимитет, како монета за поткусурување во туѓи пресметки“.
Досегашните интервенции на НАТО – од Југославија, преку Ирак до Либија – покажуваат примери на операции без соодветен или залоупотребен мандат. Во образложението беше посочено и дека постои ризик од индиректно вклучување во конфликти преку поддршка, како што е испораката на оружје за Украина, што може да има економски, енергетски и безбедносни последици.

извор