- Швајцарците со огромно мнозинство гласови на референдумот во неделата ги отфрлија иницијативите за воведување данок за наследство од 50% за најбогатите, како и за задолжителна воена служба за жените.
- Петицијата за задолжителен воен рок на жените ја поднесоа Либералните зелени, Евангелистичката партија и Партијата на пиратите. Ја одбија 82% од граѓаните.
- Предлогот за даноците опфаќаше државата да собере половина од вредноста на наследниот имот, ако таа надминува 50 милиони франци, и сумата да ја вложи во фондови против климатските промени. Против беа 79%.
- Со оваа иницијатива ќе беа опфатени околу 2.500 најбогати луѓе во Швајцарија. Противниците укажаа дека таквата мерка ќе предизвика егзодус на милијардерите кон други даночни оази како Дубаи, Абу Даби или Сингапур.
- Италија неодамна предложи рамен данок од 300.000 евра за ултрабогатите странци, а француските пратеници го одбија предлогот на левичарите за воведување даноци за домаќинствата чиј имот надминува 100 милиони евра.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
