- Демократскиот сенатор Тим Кејн ги осуди нападите врз Иран како „опасни, непотребни и идиотски“.
- „Овие напади се колосална грешка и се молам да не ги чинат животите на нашите синови и ќерки кои се во униформа или се во амбасадите низ целиот регион... Сенатот треба веднаш да одржи седница и да гласа за Резолуцијата за воени овластувања за да се блокира употребата на американските сили во непријателствата против Иран. Секој сенатор треба јавно да се изјасни за оваа опасна, непотребна и идиотска акција“, изјави Кејн.
- Сенаторот Едвард Марки го оцени нападот како „нелегален и неуставен“, затоа што не бил одобрен од Конгресот и носи ризик за сите Американци. „Дури и државниот секретар Марко Рубио призна дека Иран не збогатува ураниум... Ако Трамп не ја запре оваа војна сега, Конгресот мора. Крај на војната со Иран“, изјави Марки.
- Рубио и директорот на ЦИА, Џон Ратклиф, на брифинг со политичките лидери на републиканците и демократите од Сенатот и Претставничкиот дом ги известиле за плановите за напад врз Иран, но не им дале целосен извештај зошто акцијата би била оправдана, изјавиле за CNN функционери од Вашингтон.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
