Вести › Набрзинка

САД: Полицијата не смее да бара од Гугл локации на осомничени лица

30 јуни 2026

Врховниот суд на САД застана во одбрана на дигиталните права на граѓаните – пресуди дека полицијата не смее без судски налог да собира податоци од Гугл за локацијата на корисници на мобилни телефони.
Пресудата се однесува на случајот „Чатри против САД“, во кој полицијата лоцирала осомничен за грабеж на банка врз основа на податоци од Гугл за сите активни телефони во банката за време на инцидентот.
Администрацијата на Трамп тврдеше дека корисниците „немаат очекувања за приватност“ откако доброволно ќе ги споделат своите податоци за локација со компании како Гугл. Врховниот суд го одби ова тврдење.
„Поединецот има разумно очекување за приватност во записите за локацијата на неговиот мобилен телефон. Кога полицијата ги бара информациите, се меша во тој уставно заштитен интерес“, објави судијката Елена Каган.
Пресудата може да има влијание врз полициската практика на широки налози за претрес - барања до технолошките компании да достават информации за локации, па и за употреба на специфични фрази или изрази во разговори со лица или советувања со чет-ботови.

извор

Хаос на бензиските во Русија

30 јуни 2026

Русија, еден од најголемите светски производители на нафта, доживува невидена и апсурдна криза: земјата доживува тежок недостиг на гориво а ситуацијата на терен брзо ескалира во хаос и насилство.
Самиот Путин призна дека ситуацијата не е во потполна контрола. По вонредниот состанок со државното и военото раководство, призна дека постојат „сериозни проблеми со горивото“ што ги парализираа руските региони.
Рускиот лидер најави радикална мерка - воведување целосна забрана за извоз на бензин и керозин, а се разгледува и итна забрана за извоз на дизел. Формирана е посебна работна група за да се обезбеди земјоделскиот сектор да добива барем минимум доволно за да се спречи колапс на земјоделските култури.
Додека бирократите на Кремљ мозгаат и состанчат, доаѓаат снимки од километарски колони пред бензиските станици, луѓе со истенчени нерви, вербални и физички судири, масовни тепачки....

извор

Бомбашки напад во Монако врз противник на Зеленски

30 јуни 2026

Украинскиот олигарх Вадим Јермолаев, еден од најбогатите Украинци и политички противник на претседателот Зеленски, е тешко ранет при експлозија на бомба во Монако.
Ова е првиот терористички напад во историјата на кнежевството.
При експлозијата тешко е ранета неговата сопруга, а полесно нивниот 13-годишен син. Полицијата трага по лицето што ја поставило бомбата со клинци и сачми за да биде поубиствена.

Јермолаев се збогатил од бизнис со недвижности, а во 2019 година финансирал кампања на политички противници на Зеленски. Во 2023 година Зеленски потпиша декрет со кој се воведува десетгодишно замрзнување на имотот на Јермолаев, поради „продажба на алкохол на Крим“.
Украинскиот новинар Анатолиј Шариј, кој и самиот преживеа бомбашки напад, тврди дека Јермолаев ја управувал мрежата од кол-центри преку кои се спроведувале шеми за измама на граѓани на ЕУ. Санкциите му биле воведени кога одбил да плати голема сума пари за заштитата што ја добивал од државната служба за безбедност (СБУ).

извор