Врховниот суд на САД застана во одбрана на дигиталните права на граѓаните – пресуди дека полицијата не смее без судски налог да собира податоци од Гугл за локацијата на корисници на мобилни телефони.
Пресудата се однесува на случајот „Чатри против САД“, во кој полицијата лоцирала осомничен за грабеж на банка врз основа на податоци од Гугл за сите активни телефони во банката за време на инцидентот.
Администрацијата на Трамп тврдеше дека корисниците „немаат очекувања за приватност“ откако доброволно ќе ги споделат своите податоци за локација со компании како Гугл. Врховниот суд го одби ова тврдење.
„Поединецот има разумно очекување за приватност во записите за локацијата на неговиот мобилен телефон. Кога полицијата ги бара информациите, се меша во тој уставно заштитен интерес“, објави судијката Елена Каган.
Пресудата може да има влијание врз полициската практика на широки налози за претрес - барања до технолошките компании да достават информации за локации, па и за употреба на специфични фрази или изрази во разговори со лица или советувања со чет-ботови.
Уапсени се директорката на ЈП „Комуналец“ во Гостивар и уште двајца членови на управата откако над 3.000 луѓе се пожалија на труење од загадена вода за пиење во градот. Директорката Аратана Асани, раководителот на Одделението за водовод Вадедин Дервиши и техничкиот директор Леон Нуредини се осомничени за кривичните дела „загадување вода за пиење“ и „тешки дела против животната средина и природата“.
Обвинителството им забранува на министерот за здравство Сашо Клековски и на директорката на Институтот за јавно здравје Марија Андоновска да ги објават резултатите од анализите на водата во Гостивар „за да не се наруши истрагата“.
Неофицијално, во извештајот на ИЈЗ пишува дека од четирите испитани примероци на вода, во два се пронајдени фекални колиформни бактерии, а во еден примерок е утврдено и зголемено присуство на хлор.
Во општината Гостивар вчера беше прогласена епидемија откако околу 3.100 лица во изминатите неколку дена побарале медицинска помош поради симптоми на труење. Секој ден има по меѓу 250 до 300 новопријавени граѓани со стомачни тегоби.
Вчера во Гостивар беа дистрибуирани и првите количини пакувана вода, по одлуката на Владата да се обезбедуваат по 50.000 литри дневно бесплатна вода за пиење, сѐ додека траат препораките од надлежните институции за забрана за употреба на водата од градскиот водовод.
Премиерот Румен Радев побара од Народното собрание да дозволи во воената база Безмер да бидат стационирани максимум осум американски авиони за долевање гориво во лет, за потребите на воените операции на Блискиот Исток.
Воениот аеродром Безмер во регионот на Јамбол, 260 километри југоисточно од Софија, е објект за заедничка употреба, согласно договорот за воена соработка помеѓу САД и Бугарија од 2006 година.
Во март Софија им одобри на САД да распоредат до 15 воени авиони, со не повеќе од 500 членови на персоналот на аеродромот „Васил Левски“ кај Софија, но побара тие да не се користат во борбени операции. Договорот заврши на крајот на јуни и САД ги повлекоа своите стратегиски авиони КЦ-135 во бази во други земји.
Радев деновиве добил ново барање од Амбасадата на САД авионите да ја користат базата Безмер. „Одлуката мора да ја донесе парламентот. Целосно сум свесен за предизвиците со кои се соочуваме“, изјави Радев.
