Владејачката коалиција на израелскиот премиер Бенјамин Нетанјаху може да се распадне следната недела, откако еден од неговите клучни ултраортодоксни коалициски партнери повика на распуштање на парламентот.

Политичката криза доаѓа откако Нетанјаху им најави на ултраортодоксните владини партнери дека нема да предложи закон за ослободување на ултраортодоксните Евреи од воена служба.

„Веќе немаме доверба во Нетанјаху“, изјави Дегел ХаТора од  ултраортодоксната еврејска фракција во коалицијата на Нетанјаху. „Мораме веднаш да го распуштиме парламентот“.

Ослободувањето на ултраортодоксните Евреи од служење  војска е долготраен политички спор. Израел историски ги ослободувал од војска младите мажи и жени од побожната ултраортодоксна заедница за да можат да посетуваат верски студии, но војната во Газа и потребата од повеќе војници извршија политички притисок тие да не бидат повластени во однос нас другите Израелци. 

Ултраортодоксните политички партнери на Нетанјаху бараа да се донесе нов закон со кој трајно ќе се заштити нивната заедница од регрутацијата, бидејќи Врховниот суд ѝ наложи на владата да ги регрутира и нив.

Паднала владата или не, Израел до 27 октомври мора да одржи избори. Моментален фаворит е десничарот Нафтали Бенет.