Вести › Набрзинка

Оставки на министри поради ѕверското убиство во Ново Место

27 октомври 2025

Словенечките министри за внатрешни работи и за правда Боштјан Поклукар и Андреја Катич, поднесоа оставки откако група Роми на смрт претепале маж што го бранел своето дете во Ново Место. Премиерот Роберт Голоб ги прифати оставките и ја призна одговорноста на државата: „Луѓето имаат право на безбедност. Ова не го сфативме до вчера“.
Алеш Шутар (48) во саботата тргнал да го извлече својот син од ноќен бар, откако му се пожалил дека бил нападнат од група Роми. Кога пристигнал, групата го нападнала и го претепала. Фатален бил удар со боксирач во брадата, кој го кутнал на земјата. Лекарите констатирале тешки повреди на главата, внатрешно крварење и скршен пршлен.
Властите со години се оглушувале на барањата да спроведат поцврсти мерки за интеграција на Ромите. Барањата се засилиле во изминатите месеци поради зачестените инциденти.
„Наспроти реакциите, преовладуваат сили кои тврдат дека промени не се потребни. Години на застој, зголемено насилство, изнуда, губење на нови генерации деца кои се напуштени на улица и неуспехот да се вклучат децата во градинките и училиштата, исто така доведоа до трагична смрт на еден човек. Ваквите постапки ја откриваат целосната беспомошност на системот кој треба да обезбеди безбедност, коегзистенција и почитување на законот за сите“, објави Здружението на словенечките општини.
Лидерот на опозициската СДС, Јанез Јанша побара итно усвојување на четири закони и мерки за „елиминирање на двојните стандарди во справувањето со злосторствата на Ромите“ и побара одговорност од „сите оние кои досега ги криеле главите во песок“.

извор

Пропадна дилот за мигранти на Британија и Франција

2 октомври 2026

Британија и Франција постепено ќе го укинат договорот за размена на мигранти според принципот „еден внатре – еден надвор“, бидејќи биле депортирани премалку лица.
Од склучувањето на договорот во август 2025 година па заклучно со 1 октомври годинава, во Франција биле вратени повеќе од 1.500 нелегални мигранти, а во спротивна насока биле префрлени нешто помалку од 1.500 легитимни баратели на азил во Британија.
Проценетите трошоци за шемата изнесуваат 56.000 фунти по вратен мигрант, што достигнува вкупна сума од околу 84 милиони фунти.
За споредба, во истиот период повеќе од 40.000 нелегални мигранти пристигнале во Обединетото Кралство со мали чамци.
Лондон бил подготвен да го продолжи договорот, но Париз одбил, со образложение дека сака шема за враќање на ниво на целата Европска Унија.

извор

Прв септември без урагани во Атлантикот во овој век

2 октомври 2026

Изминатиот септември беше првиот по 32 години во кој немало ниту еден ураган во Атлантикот. Ова се случило само три пати досега – во 1994, во 1972 и во 1962 година.
Просекот е 7 урагани во сезона, од кои 2 до 3 се во септември.
Аномалијата се смета за последица на пацифичкиот климатски феномен Ел Нињо, за кој се предвидува дека годинава ќе биде најсилен досега.
Оваа година може да биде првата без ниту еден ураган во Атлантикот откако во 1950 година почна да се води прецизна евиденција. Во просек во октомври се формира по еден ураган годишно, а повремено може да има и во ноември.
Најмалку, само по два, имало во 1982 и 2013 година.

извор