- На единствениот број за итни случаи 112 дневно се примаат околу 2.000 повици.
- Пред неколку дена, на 112 се јавило лице кои пријавило дека паднало и не добива никаква помош. Кога операторите го прашале каде се наоѓа за да испратат помош, човекот рекол дека е во болницата во Велес.
- Лицето било примено во болницата, но во текот на ноќта паднал од кревет и барал помош од сестра и доктор. Никој не доаѓал два часа. Успеал да дојде до мобилниот телефон и се јавил на 112. Кога тие го префрлиле повикот во Брзата помош, овие биле збунети како сега да одат во болница да интервенираат.
- Толку.
- Рускиот претседател Владимир Путин поддржа директни преговори со Украина за нови примирја како велигденското.
- „Тоа треба внимателно да се проучи, можеби дури и билатерално“, изјави Путин за предлогот од Володимир Зеленски за 30-дневен прекин на огнот.
- Украина и Русија немале директни преговори речиси три години.
- Американскиот претседател Доналд Трамп и државниот секретар Марко Рубио во петокот предупредија дека САД ќе се повлечат од мировните напори ако двете страни „во рок од неколку дена“ не постигнат напредок.
- Шефот на Пентагон Пит Хегсет споделил детали од воениот удар врз Јемен на 15 март во група на платформата Сигнал во која биле десетина лица, вклучувајќи ги неговата сопруга, братот и личниот адвокат, објави Ројтерс, повикувајќи се на четири сигурни извори.
- Сопругата на Хегсет, Џенифер, е поранешна продуцентка во телевизијата Фокс њуз. Таа е вработена во Пентагон и присуствувала на најмалку две чувствителни средби на Пит со странски министри и офицери. Неговиот брат Фил е службеник за врска помеѓу министерствата за внатрешни работи и за одбрана.
- Хегсет веќе е под притисок откако пред еден месец беше откриено дека уредникот на порталот Атлантик, Џефри Голдберг, по грешка бил вклучен во групата на Сигнал во која се разменувале детали од воениот напад врз бунтовничките хути во Јемен.
- „Уште еден ден, уште една стара приказна, вратена од мртвите. Немало никаква доверлива информација на никаков чет на Сигнал, без оглед на колку начини настојуваат да ја напишат приказната“, коментираше портпаролот на Пентагон, Шон Парнел.
