- Илон Маск ги спои своите бизниси за вселенски мисии и вештачка интелигенција во глобално доминантна мегакомпанија за технолошки развој проценета на 1.250 милијарди долари.
- Тој нагласи дека напредокот во вештачката интелигенција би бил можен само преку поставување центри за податоци во вселената, што може да го овозможи само SpaceX.
- „Сегашниот напредок во ВИ зависи од копнените центри за податоци, кои бараат огромни количини на енергија и ладење. Глобалната побарувачка за струја за ВИ едноставно не може да се задоволи со копнени решенија, дури ни во блиска иднина, без да се наметнат тешкотии врз заедниците и животната средина... Тоа ќе овозможи бази на Месечината, цивилизација на Марс и на крајот проширување во вселената“, објави Маск.
- Спојувањето има и финансиска цел, спроти претставувањето на SpaceX на берзата до крајот на оваа година. Вредноста на SpaceX во договорот е проценета на 800 милијарди долари, а на xAI на 200 милијарди. На овој начин xAI може да биде првиот бизнис со јазичен модел со ВИ што ќе се појави на американската берза.
- Маск лани ги спои X со xAI и во социјалната платформа зајакната со ВИ инвестираше уште 2 милијарди долари од својата автомобилска компанија Тесла. Милијардерот, исто така, неодамна објави дека ќе откаже производство на некои модели на електрични коли, за да ослободи повеќе простор во фабриките да произведува хуманоидни роботи.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
