Од 2017 година „Лотарија на Македонија“, без разлика што и самата не поседува лиценца самата издавала лиценци за приредување на игри на среќа, рече премиерот Христијан Мицкоски. Документацијата е предадена на истражните органи и очекува надлежните институции да излезат со став.
„Има претходни високи функционери од Владата коишто и покрај тоа што знаеле дека ова е спротивно на Закон дозволиле ваков тип на игри на среќа да се приредуваат, а со тоа ги оштетиле и граѓаните и Буџетот“, изјави премиерот Мицкоски.
Оваа информација следи откако претходно деновиве беа одземени две лиценци на фирми од Струмица и од Скопје, кои, како што тврди премиерот не плаќале редовно данок.
Кандидатот на демократите Зохран Мамдани првиот муслимански градоначалник на Њујорк. На изборите, кои на некој начин беа референдум за првите десет месеци од власта на Трамп, Мамдани освои 50,4% од гласовите пред независниот Ендру Куомо (41,6%) и републиканецот Куртис Слива (7,1%).
„Демократскиот социјалист“, како што се претставува прогресивецот, до пред некој месец беше непознат за пошироката јавност. Во кампањата ветуваше дека ќе ги оданочи милионерите за да ги прошири социјалните програми. Ветуваше бесплатен автобуски превоз, универзална грижа за деца и намалување на кириите.
Претседателот Доналд Трамп ги повика њујорчани да гласаат за поранешниот демократ Куомо и се закани дека ќе ги укине федералните средства за Њујорк ако победи „комунистот“ Мамдани.
„Во овој момент на политички мрак, Њујорк ќе зрачи светлина“, изјави Мамдани. На претседателот Трамп му порача дека „градот во кој доживеал подем може да го порази“.
Кандидатите на демократите победија и на изборите за гувернери на Вирџинија и Њу Џерси. Калифорнија изгласа прекројување на избирачките единици за конгресмени, во полза на демократите.
Десет луѓе загинаа и најмалку 20 се повредени во пожар во пензионерски дом во Тузла. Сите загинати се пензионери, а меѓу повредените има пожарникари, медицински лица, полицајци и вработени во домот.
Пожарот избувнал синоќа во 20.55 часот на седмиот кат на зградата, каде што биле сместени лица со попреченост.
Противпожарите екипи брзо интервенирале и за еден час го изгаснале огнот, но не можеле навремено да им помогнат на пензионерите, меѓу кои имало и болни и неподвижни лица. Причината не е уврдена.
