- Градоначалникот на Скопје Орце Ѓоргиевски и неговата претходничка Данела Арсовска, ќе треба да платат казна (од 300 до 500 евра) бидејќи не поднеле изјава до Комисијата за спречување на корупција за имотот што го поседуваат, пред и по нивното доаѓање на функцијата, со цел да се види дали и колку се збогатиле. Новиот скопски градоначалник не доставил анкетен лист ниту кога си заминал од општината Кисела Вода, за што имал рок од триесет дена.
- На листата на луѓе кои не ја исполниле законската обврска се уште 16 градоначалници.
- Кабинетот на Ѓорѓивески вели дека тој не успеал да го поднесе анкетниот лист поради интензивни работни обврски поврзани со преземањето на новата функција и дека тоа ќе го стори во наредните денови.
- Европскиот парламент ја усвои шемата што им дозволува на жени од членки што забрануваат абортуси бесплатно да прекинат бременост во други членки на ЕУ.
- Од буџетот ќе биде издвоен посебен фонд за да им се помогне финансиски на жени од земји со строга забрана, како Малта и Полска, да ја прекинат бременоста во полиберални земји, како Франција, која правото на абортус го вгради како уставно гарантирана слобода.
- Предлагачите на законот истакнуваат дека мерката ќе придонесе за намалување на ризикот од тајни абортуси во небезбедни услови.
- Критичарите велат дека Брисел се меша во националните закони и ги загрозува традиционалните христијански вредности.
- Одлуката на Европскиот парламент, изгласана со 358 наспроти 202 гласа, е само препорака до Европската комисија, која во март треба да реши дали ќе донесе соодветен закон.
- Српскиот претседател Александар Вучиќ нема да учествува на самитот ЕУ – Западен Балкан во знак на протест поради тоа што Брисел не го признава напредокот на Србија.
- „Првпат во изминатите 13 или 14 година ни јас ни никој друг нема да одиме на таа меѓувладина конференција. Никој нема да ја претставува Србија, па така Западен Балкан ќе биде без Србија... Верувам дека со ова ја штитам Србија и нејзините интереси, затоа што мораме да покажеме што сè направивме, а направивме многу“, изјави Вучиќ.
- Србија доби статус на кандидат за членство во ЕУ во 2012 година. Бавно напредуваше во преговорите и запре по 2021 година. Министерот за европски интеграции Немања Старовиќ ја обвини ЕУ дека нема желба да ги признае реформите и напредокот на Србија во пристапниот процес.
- „Таа порака (од ЕУ) само ги подгрева антиевропските наративи и ги обесхрабрува оние што ги спроведуваат реформите во општеството. Отсуството на Србија ги брани достоинството на граѓаните и интегритетот на пристапниот процес, како и кредибилитетот на европската идеја во Србија“, изјави Старовиќ.
- Опозицијата ја критикува одлуката на Вучиќ како „емотивна уцена“ поради разочарувањето дека Албанија и Црна Гора напредувале повеќе и веројатно ќе станат новите членки на ЕУ.
