- Корисниците на Инстаграм од денеска повеќе нема да можат да испраќаат заштитени приватни пораки. Исклучувањето на енкрипцијата „од крај до крај“ (E2EE) му овозможува пристап на Инстаграм до целата содржина на директните пораки, вклучувајќи слики, видеа и гласовни белешки.
- „Шифрираните пораки на Инстаграм повеќе нема да бидат поддржани по 8 мај 2026 година. Ако имате разговори засегнати од оваа промена, ќе видите упатства како да ги снимите“, соопшти матичната компанија Мета.
- Ова е голем пресврт во политиката на Мета, која ја застапуваше Е2ЕЕ како „златен стандард за приватност на корисниците“. Во 2023 година ја вгради во Фејсбук месинџер и ја направи опционална во Инстаграм, со план да ја направи стандардна.
- E2EE е стандарден систем во Signal, WhatsApp, Facebook Messenger, Apple's iMessage и Google Messages. Telegram го нуди како опција. X нуди сличен систем за директни пораки. Snapchat го користи за фотографии и видеа. Discord планира стандардни енкрипции на гласовни и видео повици. TikTok нема планови да ја воведе технологијата за директни пораки.
- Групи за заштита на деца долго време бараа да биде укината оваа најбезбедна форма на онлајн пораки, оценувајќи дека дозволува ширење на екстремна содржина онлајн без властите да можат да интервенираат. Затоа настрада приватноста.
- Викторија Бејнс, професорка по ИТ на колеџот Грешам, верува дека причината за одлуката е покомплексна. „Платформите ги монетизираат нашите комуникации, нашите објави, лајкови и пораки, за да можат да прикажуваат насочено рекламирање. И сè повеќе компании како Мета се фокусираат на обука на модели со ВИ за кои податоците за пораки можат да бидат исклучително вредни“, вели Бејнс.
- Европската комисија изрече казна од 200 милиони евра за кинеската компанија Тему поради тоа што на европски потрошувачи им продавала „илегални и непроверени“ производи, кои не ги исполнуваат стандардите од Законот за дигитални услуги (DSA).
- Од 2024 година Комисијата спровела истрага со тајни купувања од независна организација за тестирање. Откриено е дека висок процент на полначи за батерии купени преку Тему не ги поминале основните тестови за електрична безбедност.
- Кај голем дел од играчките за бебиња бил утврден среден до висок ризик за безбедноста - содржеле хемикалии над законските ограничувања или имале ситни делови што се опасност од задушување.
- Тему соопшти дека ги почитува целите на DSA и важноста на правилата за дигитална економија, но ја смета казната за „непропорционална“.
- Одлуката на ЕУ му налага на Тему до 28 август да поднесе план како да ги исправи грешките. Ако не ја почитува одлуката, може да се соочи со периодични казни, покрај сегашната од 200 милиони евра.
- Обединетите нации ја додадоа израелската Затворска служба на црната листа на ентитети обвинети за сексуално насилство во зони на конфликт за 2026 година.
- Основа за додавањето на израелските ентитети на листата е извештајот на специјалната известувачка на ОН, Алис Џил Едвардс, која собрала информации за 52 случаи за различни форми на тортура во израелски затвори, како и 33 случаи на сексуална злоупотреба. Случаите вклучуваат: „тепања, стресни пози, струјни удари, лишување од сон и гладување“.
- На оваа листа на ОН се терористички организации, а во август 2025 година беше додаден и палестински Хамас.
- Како реакција Израел ги прекина сите контакти со генералниот секретар на ОН, Антонио Гутереш. „Секој што го вклучува Израел на истата листа со терористите и силувачите на Хамас нема чувство за морал“, коментира израелскиот амбасадор во ОН, Дани Данон.
