- По напад со дрон во февруари, заштитниот штит изграден над остатоците од нуклеарната централа Чернобил во Украина повеќе не ја извршува својата основна функција – целосно да спречува истекување радијација од стопените реактори, објави Меѓународната агенција за атомска енергија (МААЕ).
- Во 2019 година беше комплетиран „саркофагот“ од бетон и челик над реакторите во Чернобил што беа уништени во хаваријата во 1986 година. На 14 февруари годинава дрон со експлозив удри во надворешната челична заштита и направи голема дупка. Киев и Москва меѓусебно се обвинуваат кој го извршил нападот.
- Инспекција од МААЕ утврдила дека нема истекување на радијација, не се загрозени носечката конструкција и системите за следење на зрачењето, но и дека е зголемен ризикот од деградација на оштетениот заштитен слој.
- „Мора да се направи сеопфатна поправка за да се обезбеди долгорочна нуклеарна безбедност“, изјави генералниот директор на МААЕ, Рафаел Гроси.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
