Вести › Набрзинка

Хрватска воведува доживотен затвор за екоцид

31 август 2026

Од први јануари 2027 година, Хрватска ќе воведе доживотен затвор за сторители на 15 од најтешките кривични дела, вклучувајќи неповратно или долготрајно загадување на животната средина.
Најстрогата казна ќе им се изрекува на сите возрасни лица над 18 години, без да се поштедат помладите возрасни лица.
Осудениците ќе стекнат право да поднесат барање за условна слобода дури откако ќе отслужат 25 години.
Покрај тоа, санкциите за компаниите значително се заоструваат, па казните за екоцид и најсериозно загадување на животната средина ќе се зголемат до 50 милиони евра.

извор

Психијатар за осомничениот сериски убиец: Глуми лудило

31 август 2026

Во Куманово продолжи судскиот процес против осомничениот сериски убиец од Старо Нагоричане на кој му се суди за четири убиства и два обида за убиство.
По службена должност му беше доделен адвокат, откако на претходното рочиште адвокатот му го откажа полномоштвото зашто спротивно на неговите совети тој не призна вина.
За однесувањето на обвинетиот на првото рочиште (се смееше и гледаше во плафон), невропсихијатарот Мице Дудучки вели: „Се работи за личност која во просториите на судот покажува псевдодементно однесување, а ние психијатрите тоа го нарекуваме Ганзеров синдром, односно глумење лудило, со цел – “не се сеќавам“.
Тој нагласува дека постоењето психопатологија само по себе не значи дека едно лице е непресметливо.
„Јас сум поборник на смртна казна кога се работи за убиства со умисла, посебно од користољубие“, вели Дудучки.

извор

Повторно се отвора истрагата за мазутот во „ТЕЦ Неготино“ поради слабости во вештачењата

31 август 2026

Вишото јавно обвинителство ја укина одлуката на обвинителката Катерина Коларевиќ која ја запре истрагата за случајот ,,Мазут во ТЕЦ Неготино“, што значи дека предметот е вратен назад во Обвинителството за гонење на организиран криминал и корупција на повторно постапување.
Истрагата за овој случај, тежок 167 милиони евра, почна во март 2025 година. Под истрага беа 13 лица и една фирма поради сомнежи за злоупотреби, незаконски договори и анекси и перење пари во постапките за набавка на мазут за потребите на ТЕЦ Неготино, спроведени во услови на енергетска криза во периодот 2021-2023 година.
Во фокусот на истрагата беше фирмата РКМ која го добила тендерот и нејзините сопственици Ратко Капушевски и Ерџан Сулкоски. Меѓу осомничените беше и сопственикот на Пуцко Петрол, Асмир Јахоски, син на пратеникот на ДУИ, Исмаил Јахоски. Сулкоски е поранешен вработен во Пуцко Петрол, а потоа стана еден од сопствениците на РКМ заедно со Капушевски.
Во истрагата беше опфатен и екс директорот на ЕСМ, Васко Ковачевски кој е во бегство и се бараше со меѓународна потерница за случајот Адитив. Опфатен беше и уште еден поранешен директор на ЕСМ, Адријан Муча, пишуваат колегите од Колегиум.

извор