Вести › Набрзинка

Холандија ќе затвора 3.000 функционални фарми за да угоди на зелената агенда

29 ноември 2022

Холандската влада планира да откупи па да затвори до 3.000 фарми, за да биде во согласност со препораките за заштита на животната средина на Европската унија.
Фармерите имаат опција доброволно да ги затворат фармите, а во спротивно владата ќе почне со присилен откуп во кој ќе им биде понудена цена од 120% над реалната вредност на имотот.
На фармите во Холандија им се припишува речиси половина од загадувањето со азот, а националната агенција за животна средина предупреди дека биодиверзитетот во државата опаѓа побрзо во споредба со другите земји во Европа.
Претходните вакви агенди и обиди на холандската власт беа пречекани со масовни земјоделски протести и блокирање на целата држава.

извор

Во Британија ќе се гласа со наполнети 16 години

17 јули 2025

Од следните избори во Британија право на глас ќе имаат и тинејџерите со наполнети 16 години. Тоа ќе донесе околу 1,5 милион нови гласачи.
Границата досега беше 18 години. Шкотска и Велс веќе ја спуштија на 16 години за регионалните избори.
„Ако се доволно возрасни за да работат, да плаќаат данок и да служат војска, зошто да не можат да гласаат“, вели лабуристичкиот премиер Кир Стармер.
„Како може да гласаат, ако немаат право да склучат брак, да одат во војна или да се кандидираат на избори“, возвраќаат ториевците, кои се против одлуката.
Ќе се променат и други услови за гласање. За идентификација ќе може да послужи платежна картичка од која било британска банка. Ќе се заострат условите за донации за да се спречи мешање во изборите од странство. Сега секоја британска компанија може да донира во кампања, без оглед кога била основана, кои се сопствениците и од каде ѝ се парите.

извор

Волт во Хрватска штрајкуваат

17 јули 2025

Доставувачите на платформата Волт во Хрватска за денес закажаа штрајк „поради драстичниот пад на приходите, намалувањето или укинувањето на бонусите, неподносливите услови за работа и систематските закани кон работниците кои се обидуваат да преземат колективна акција“.
Од компанијата реагираа дека жалат што дел од доставувачите се решиле на ваков чекор но дека поголемиот дел од нив се задоволни од соработката со Волт и дека слободата и флексибилноста - да работат кога и колку сакаат - остануваат клучни причини што ја избрале таа платформа.
„Работам 12 саати дневно, шест дена во неделата, соба плаќам 350 евра, скутер и гориво 500, тука се и Волт, даноци.... Знаете ли колку ми останува на крај?“, вели за Јутарњи еден од доставувачите, Индиецот Анураг.

извор