Владата донела одлука за субвенционирање на авиосообраќајот по дестинации, а не како досега по авиокомпании, соопшти министерот за транспорт и врски Александар Николоски.

„Досега се субвенционираше по патник на заминување од Македонија, а отсега ќе субвенционираме по патник на доаѓање во Македонија. Целта е да носиме луѓе, туристи, на поевтин начин. Второ, ако претходно беше 7 евра по патник на заминување, сега субвенцијата ќе биде 9 евра по патник на доаѓање на Скопскиот аеродром. Ако претходно беше по 4 евра од Охридскиот аеродром, сега со стимулирање на туризмот, ќе биде 12 евра по заминат патник од овој аеродром“, кажа Николоски.

Субвенциите за новите дестинации ќе може да има и за линии надвор од ЕУ.

Мотив за промените е да се намали зависноста од една компанија, како што е унгарскиот нискобуџетен превозник „Визер“ кој држи над 60 проценти од целиот авиосообраќај на двата македонски аеродрома.