Вести › Набрзинка

Амнестија за бранителите на Перу од маоистичките герилци

14 август 2025

Перуанската претседателка Дина Болуарте го потпиша законот за општа амнестија на војниците и полицајците обвинети за прекршувања на човековите права во периодот на судирите со маоистичките герилци од 1980 до 2000 година. За време на граѓанската војна во Перу загинаа повеќе од 69.000 луѓе, а исчезнаа уште 20.000.
„Се признаваат жртвите на членовите на оружените сили, полицијата и групите за самоодбрана во борбата против тероризмот. Им ги враќаме достоинството, кое никогаш не смееше да биде оспорено“, изјави претседателката.
Со законот се поништуваат повеќе од 156 пресуди и повеќе од 600 судски процеси против припадници на силите за безбедност поради прекршување на човекови права во пресметките со герилците од Сендеро Луминосо, Тупак Амару и со други радикални левичарски групи.
Законот за амнестија беше предложен од десничарската партија Народна сила, формирана од поранешниот претседател Алберто Фухимори. Тој беше осуден на 25 години затвор поради прекршување човекови права, но беше помилуван во 2023 година.
Групата Амнести интернешнел бараше од претседателката да не го потпишува законот, бидејќи за многумина осудени е докажана вина за произволни убиства, киднапирања, мачења и силувања.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор