Вести › Набрзинка

Агент на OpenAI хакирал владини системи на Австралија

24 септември 2026

Агент со ВИ на OpenAI автономно извршил хакерски напад во неколку системи на австралиската влада, објави премиерот Ентони Албанезе. Ова е прв потврден случај во кој модел со ВИ од најновата генерација самоиницијативно хакирал владини системи на друга земја.
Решавајќи барање да состави здравствени и медицински статистички податоци, ботот упаднал во австралискиот систем за здравствена заштита Медикер и во мрежите на Министерството за здравство на Викторија и на Бирото за статистика и истражување на криминалот на Нов Јужен Велс. Во оваа фаза од истрагата се смета дека не се компромитирани лични здравствени податоци.
Нападот бил извршен во јуни. OpenAI го открил во август. Ја известил владата на Австралија со имејл до јавното поштенско сандаче на владата на 10 септември. Министерката за владини прашања била известена дури на 17 септември.
Премиерот Албанезе формира работна група во која се вклучени повеќе агенции за безбедност за да го истражат инцидентот. Во Њујорк лично разговарал за упадот со Сем Алтман, извршниот директор на OpenAI.
„Да стануваше збор за кинески или руски модел, реакцијата ќе беше значително поинаква од обичен разговор со Алтман“, забележува Кори Алперт, докторанд кој го проучува влијанието на ВИ врз демократијата на Универзитетот во Мелбурн.

извор

Одборот на Трамп има нов план за Газа, ама нема пари

23 септември 2026

Одборот за мир на Доналд Трамп денеска ќе претстави шестмесечен план за обнова на Газа, во кој се предвидени 66 проекти во вкупна вредност од 2,45 милијарди долари.
За инфраструктура се планирани 1 милијарда долари: 400 милиони за привремени засолништа, 275 милиони за расчистување урнатини и неексплодирана муниција, 50 милиони долари за санација на болници и 30 милиони за обнова на патната мрежа, за дигитални документи и плаќања, за преносни сончеви колектори...
За безбедноста се издвоени 885 милиони долари: за изградба на база на Меѓународните сили за стабилизација во Рафах и за обука и опремување на нејзиниот контингент од 5.000 припадници, како и за мобилизирање нови палестински полициски сили.
Планот ја проценува материјалната штета во Газа на 35,2 милијарди долари и наведува дека за целосна реконструкција ќе бидат потребни 71,4 милијарди долари во следната деценија.
Планот звучи амбициозно, ама е далеку од реалната ситуација. Одборот за мир, во кој членуваат 35 земји, се уште ги нема обезбедено потребните 2,45 милијарди долари. Спроведувањето на проектите зависат од Хамас – кој одбива да се разоружи - и од составот на идната влада на Израел по изборите на 27 октомври. Премиерот Нетанјаху начелно прифаќа меѓународни сили во Газа, но неговите потенцијални партнери се категорично против.

извор

Брисел го награди Маѓар со пристап до 4,2 милијарди евра

23 септември 2026

Европската комисија ѝ ослободи на Унгарија пристап до 4,2 милијарди евра од кохезионите фондови и до програмите Еразмус+ и Хоризонт Европа, откако оцени дека новата влада на Петер Маѓар ги исполнила условите за владеење на правото.
ЕУ од 2022 година блокира 16,4 милијарди евра за Будимпешта, наведувајќи „загриженост за корупција и јавни набавки“ за време на мандатот на премиерот Виктор Орбан и неговата партија Фидес.
Маѓар, кој во кампањата за изборите во април доби поддршка од Брисел, вети дека приоритет на новата влада ќе биде одмрзнување на фондовите од ЕУ.
Будимпешта се обидува да добие и 10 милијарди евра од средствата на ЕУ за закрепнување од последиците на пандемијата. Остануваат блокирани и уште 2 милијарди евра од кохезионите фондови поради загриженост во врска со системот за азил, законот за заштита на децата и академската слобода. Маѓар вети дека ќе ги реши овие прашања до крајот на годината.

извор