- Српскиот турбо-фолкер Аца Лукас синоќа бил уапсен во Кавадарци по настап со кој биле прекршени многу закони и прописи.
- Лукас настапувал во локалот „Рома“, кој бил регистриран како кафетерија и немал дозвола за ваков вид настапи. Максималниот капацитет бил 200 гости, а таму имало близу 500.
- Инспекторите на УЈП, ДПИ , Инспекторатот за работа на странци и МВР утврдиле дека се продавале ваучери за 18.000 денари без фискални сметки и незаконски се продавале влезници од по 1.000 денари.
- Аца Лукас имал нерегистриран престој во Македонија и непријавен краткотраен работен ангажман. Тој во Кавадарци ја промовирал својата криптовалута „лукаскоин“.
- Полицијата соопшти дека Лукас бил спроведен по кратка постапка во Основниот суд Кавадарци, каде што му била изречена парична казна.
- Кина обезбедува клучна поддршка за руската агресија во Украина и би можела да ја заврши војната со еден телефонски повик, изјави американскиот амбасадор во НАТО.
- „Пекинг би можел да му се јави на Владимир Путин и да ја заврши оваа војна утре, ако го прекине доставувањето технологии со двојна намена. Би можела и да престане да купува руска нафта и гас“, изјави амбасадорот Метју Витакер.
- Русија се потпира на Кина за набавка за критични делови и компоненти за беспилотни летала и друга воена опрема. Откако Европа воведе санкции за Москва, Кина стана и најголем увозник на руска нафта.
- Во јануари во кинеските пристаништа просечно пристигнувале по 1,65 милиони барели руска сурова нафта. Тоа е најмногу од март 2024 година и второ највисоко количество по инвазијата врз Украина пред четири години.
- Кинеското Министерство за надворешни работи ги отфрли како „целосно неосновани“ обвинувањата дека ги поддржува воените напори на Русија.
- Почина театарската, филмска и телевизиска глумица Ленче Делова, соопшти Драмски театар, нејзината матична куќа. Имаше 77 години.
- Нејзиниот талент, сценска присутност и човечка топлина оставија неизбришлива трага на сцената и во срцата на публиката. Со секоја улога таа внесуваше искреност, емоција и посветеност, градејќи ликови кои долго ќе се паметат. Нејзината насмевка и ведриот дух беа светлина зад сцената, а нејзината професионалност пример за генерации актери, напишаа колегите.
- Делова играла во 60-тина претстави во Драмски театар, а глумеше и во над 30 филмови.
