Старецот и морето - одличен наслов за биографски роман напишан од извесна инфлуенсерица која што пола година е на море, се слика по луксузни хотели, а никако да го обелодени фотографот. Мистерија. Ова истоимено капитално дело на “Големиот Тате“ Хемингвеј ги краси полиците на купишта домови низ земјата, светот и пошироко. Длабока прича напишана во клучот на ’краток ем јасен реализам‘ која зборува за извесен кубански чика којшто е на мисија да улови едра туна. А сите добро знаеме дека туната е риба со конзервативни сфаќања. Барем таков углед ужива помеѓу широките народни маси и обрнатите предкоперациски гајби. Туна-конзерва и кромид е еден од најважните деликатеси на вредните градежни работници. Сосема заслужено го носи среброто под шампионскиот градежнички сендвич: пола леб + павлака + 300 грама алпска. Покрај оброк, супер мезенце и за со пивчуги и за ракијање. Сума сумарум - спектакуларна нискобуџетна занимација.
Јас денес ќе ѝ пристапам на туната поинаку. Кромидот ќе го заменам со праз а што се тиче риба - свежи парчиња туна со сусам. Брасериски пристап на припремање храна - евтини и едноставни намирници, третирани достоинствено, изгледаат сензационално.
Прво празот: го сецкаме само белиот и светлозелениот дел. Темнозелените листови го отстрануваме. Јас прибидејчи готвам за еден дуШ, ќе спремам само едно парче праз. Вие адаптирајте ги количините према аудиториумот. Загреваме тенџере со вода и го проверуваме празот 15-20 минути.
За тоа време припремаме винагре: маслиново+балсамико+сенф+кршени лешници. Соединуваме и добиваме магичен прелив. Омекнатиот праз го сецкаме напречно, а добиените половинки уште еднаш напречно. Посолуваме, забиберуваме и парчињата ги преливаме со винагрето. Обарениот праз веќе ослободил благи и рустични ноти, се дотерал во умими костим, нема да можете да го познаете.
Гарнирот ни е изгарниран. Идеме на рибата. Парчињата туна ги премачкуваме со маслиново. Сол & бибер. На рамна чинија истураме сусам и ја тркаламе рибата. Треба да се налепи сусам што е можно повеќе низ целата површина. Е сега, термичката обработка: ресторански, туната се служи мидиум реар, или полужива. Средината треба да остане розева. Но може да е и саглам печена. Поентата е да не ја исушите, затоа што никој не сака да јаде рибји картон. Пржете ја на тава, 3-4 минути по страна на умерено-силен оган. Вака ќе искочи малку попечена од полуживата. Јас ја печев во рерна. 180 степени, 6-7 минути по страна. Екстра искочи.
Послужуваме со лимон и свежа салата по избор. Вака припреманата туна ми испи 2 ипол литра вино. Без око да и трепне. Ладнокрвно.
Кирил Стоименов - омега петкаш
