“Рестовано месо" - веројатно југословенизам за “roast” или бавно печено месо. Фак да рестованс, ви ар да бестованс. Дали некогаш имате рестовано телешко филе? Не а? Епа, не знаете каква журка прошуштате. Јас рестовав и супер си поминав. Кој рестова, зло не мисли.
Плус тоа, ја осветлив туна-конзервата од еден поинаков агол. Од пред кооперација ја уцуцлив на бизнис поткаст. Значи таква драстична разлика.
Денешниот рецепт по извод на матична книга на зготвени се вика Витело Тонато. Роден е во Пиемонт, северна Италија. Година: непозната. Пол:а кило у најмала рака. На сериозната страна на приказната: редовно главно јадење за Божиќ по Јужна Америка, особено Аргентина и Уругвај. Микс од бавно печено телешко и мајонез направен на база на туна. Одлично за слави. А слава е, нели, секој ден. Вистинските знаат.
Затоа, ваистински, ајде, мечкин скок помеѓу двете точки:
600 грама телешко филе. Му задаваме BDSM плетка со кујнски конец. Доколку имате две леви раце или немате кујнски конец, слободно скокнете го овој чекор. Како и да е, парчето месо го запржуваме на растопен путер на средно-силен оган, 3 минути по страна. Знам дека за страна треба ќоше, а кругот ќоше нема, но реков “по страна“ за побрза комуникација.
Откако имаме фатено тен - тен аут од тен (10/10), парчето месо го тркаламе во смеса од ситно сецкан рузмарин, кора од лимон, сол и лук.
Потоа го селиме во загреана рерна на 180 по Целзиусовски едно пола саат. На секои 10 минути проверувајте ја внатрешната температура на филето. Крајната цел ни е 70 степени. Ако немате уред за мерење на внатрешна температура, одете од око, иако е многу тешко. Зависи од дебелината на парчето и квалитетот на месото. Набавете си ваков мерач, у рајот е измислен. Башка се пошто-зашто.
Додека месото се рестова, ние го спремаме рестото од рецептот.
Во блендер: 1 јајце, лажица сенф, 3-4 инчуни, 2 лажици капери, конзерва туна. Блендерот на најјако. Се бара густ сос налик на мајонез. Текстурата многу зависи од температурата на намирниците.
Совет: оставете ги на собна температура барем еден час пред да ги блендирате. Така ќе сосот ќе биде погуст. Зачинуваме со сол и бибер.
Месото е готово. Го одмараме на собна температура едно 40 минути. Мора добро да олади и да ги скроти страстите. Вака џусовите ќе си останат внатре и ќе приредат сетилни бесценетости. Кога ќе се олади, го сецкаме на што е можно потенко.
Ако имате од оние циркуларите за имендени шо се користеа во домаќинствата пред месарите да почнат да ги сецкаат нештата на лице место, исецкајте го со таков. Ако не, со остар нож. Секое парче треба да блеска со внатрешната розевост и исончаната површина.
Засолуваме дополнително. Врз месото го нанесуваме сосот. Фрламе малку капери и буковец. Нема промашај тука. Секој залак си е приказна за себе. А залак ко залак, си бара голтка. Или харем од голтки - цела флаша.
На здравје!
Кирил Стоименов - телешка новела
