a.k.a. роловано пилешко на хедонистички начин.
Хедонизмот може да се посматра од повеќе аспекти: психолошки - вечна потрага по желба за задоволство; еротично-егоистичен - дејствување во склад со она што носи долгорочно задоволство; па естетски, па етички, па универзален итн...
Ние денес ќе ѕиркаме низ призмата на кулинарскиот хедонизам, поточно, безвременската сага за запослување на стечајците шо ни штрајкуваат низ стомак.
На репертоарот имаме роловани пилешки гради со супер-перверзно полнење, a.k.a. пилешки ролат, a.k.a. пилечи увијач, или што би рекле припадниците на ромската етничка заедница (пиууу ама е долг описот, шо не им измислат некоја кратенка) - пилешки УБИЈАЧИ!!!
Ем вкусно, ем свечено, ем мезе за различни алкохоли, ем евтино (мање/више), башка и здраво.
Епа ај здраво!
У зависност за колку грла го спремате, количините на намирниците ќе варираат. Јас имам два пилешки стека од по околу 300 грама. За почеток парчињата месо ги отвораме на пола со такозвани батерфлај-кат, шо би рекле селебрити куварите шо никогаш не пробале дроб-сарма.
Откако месото ни е поминато со ефект на пеперутка, го поставуваме врз и покриваме со најлонска фолија. Избираме ладно оружје: кујнски чук за месо, ѓезве, мало тенџере за сосови, бејзбол палка, тупата страна од секирата, наковална. Како онаа шо стално му паѓа врз глава на Којотот. Од Луни Тјунс. Со лефтерни потези, без премногу притисок го удираме месото како би го истенчиле до посакуваната дебелина. Пошто нема логика да го здебелиме до посакуваната тенкоќа.
Откако сме готови, целата површина на парчето ја премачкуваме со сенф. Врз него наросуваме оригано. На ред е перверзното полнење, или стафингот, шо би рекле истите кувари од погоре.
У длабоко садче истураме 100-150гр. лебни трошки алијас презла, една полна шепа сува брусница/грозје, иста толкава шепа ситнети ф'стaци или ореви или лешник, сетне сол, бибер и лук во прав и на крај една жолчка. Промешуваме додека не добиеме полу-леплива смеса. Смесата ја нанесуваме врз сенфот. Ќе заборавев, исецкајте на ленти и свежа мента. Опционално е. Откако го имаме слојот од смесата распространет низ месото како Беровци по Скопје, полнењето го финишираме со мали парчиња плаво сирење, или на Дел-Пјеровски: горгонзола.
Вака спремното парче месо почнуваме да го мотаме притоа помагајќи си со најлонската фолија врз која е поставено. Потрудете се да биде што е можно постегнато. Притиснете со прстите, нека не ви е незгодно. Откако имаме цилиндер у форма на блу-тут звучник, истиот го умотуваме во парчето најлонска фолија. Ја стегаме силно како свадбени панталони после пирошката. Саат време на зимување у фрижидер. Да фати мајата.
Додека месото кулира, да збркаме брз сос. Сте чуле ли за чимичури? Како што ние со Грците имаме спор околу Македонија, така Аргентина и Уругвај имаат спор околу чимучурито. А чим се дешава спор, 100% е нешто многу јако. Сецкаме мноооогу магданос на мноооогу ситно, додаваме ситно сецкан лук у колабирачки количини, ставаме во сад, тушираме со зеленчуково масло и балсамико и на крај наросуваме со сол, оригано и буковец. Честитки, добитници сте на опасен сос за сите видови месишта.
Кога месото е солидно измрзнато, на ред е да го шокираме со топли облоги. Го вадиме од фрижидер, го поставуваме во сад за печење, го премачкуваме со малку зејтин по свој избор, може да му прснеме малце црвен пипер, сол и бибер због заради боја, а кој сака може да џитне и троа сусам. У претходно загреана рерна на 200 степени печеме околу 25 минути.
Додека месото се пече, инсталираме пива, шприцери и ракии, или некои други странски ватрени води.
Кога е готово, го оставаме да се олади барем 15-тина минути. Не е пожелно веднаш да се сече затоа што никој не сака Нијагара од внатрешноста на увијачот. Башка иде фира. Го сечеме на тркалца, пососуваме од чимичурито и делкаме со сета сила.
Пробајте и заблагодарете ми се покасно. Бонбон апетит!
Да сумираме:
За убијачите:
300 грама пилешки гради
2 лажици сенф
100-150гр. Презла
25 гр. сува брусница/грозје,
30 гр. ситнети фаст'ци, ореви ил лешник,
1 жолчка
Сол, бибер, лук во прав
За сосот:
грст магданос
3-4 чешниња лук
растително масло
балсамико/Јаболков оцед
оригано, сол, бибер, буковец
За частење пиво кога ќе го видите на шанк:
Кирил Стоименов
