Земјоделците предупредуваат дека Британија се соочува со итна и голема криза за храна. Од Агенцијата за животна средина бараат да покаже поголема флексибилност во однос на правилата за црпење вода за да се избегнат катастрофални последици.
Во некои области сè уште не е завршена жетвата, па она што ќе се случува во текот на наредната недела или десет дена може да има големо влијание, изјави портпарол на Националниот сојуз на земјоделци.
Во супермаркетите јасно се гледаат знаци дека кризата со снабдување веќе почнала. Поскапени се основните прехранбени производи - лебот, млекото и јајцата. Месото станува луксуз кој многумина не можат да си го дозволат. Покрај високите цени, полиците стануваат сè попразни, а снабдувањето е понестабилно.
Како и во случајот со многу други проблеми што немилосрдно ќе нè погодуваат во текот на следните пет години, нашите лидери одлучија ова да го претстават како проблем на Глобалниот југ, наместо отворено да зборуваат за ризиците по снабдувањето со храна со кои се соочуваат британските домаќинства, забележува Луси Истхоуп, експерт за планирање при катастрофи.
Новиот Национален регистар на ризици, објавен оваа недела, се фокусира само на актуелната ситуација и ги игнорира ризиците во иднината. Недостигот на храна како последица на ненадејни сценарија е спомнат 86 пати, за разлика од 32 пати лани. Но, на пратениците им е претставено само резиме на 14 страници, во кое не се вклучени предупредувањата дека глобалниот колапс на екосистемот веројатно ќе предизвика сериозен недостиг на храна во рок од пет години.
Кризата со храна во Британија е последица на лоши политички одлуки со години наназад. Увозот на храна е значително повисок од извозот, што ја прави земјата исклучително ранлива на нарушувањата во синџирите на снабдување и драстичните флуктуации на цените.
Едноставно не ја цениме доволно храната произведена на нашата сопствена почва. Производството само делумно е прилагодено на климатските промени, вели Истхоуп.
Според Националниот сојуз на земјоделци, во 2022 година на фармите пропаднала храна во вредност од 60 милиони фунти бидејќи немало кој да ја собере. Повеќе од 30.000 здрави свињи биле усмртени поради недостиг на работници во кланиците и месарите. Многу земјоделци сега се откажуваат од оваа дејност, ја продаваат земјата или ги претвораат нивите во соларни паркови.
Производи со висока содржина на масти и шеќер, кои едвај може да се наречат храна, се промовираат како алтернатива за да се чувствуваме сити, но не и нахранети. Како и со другите наши витални залихи, водата и електричната енергија, ја направивме храната стока за профит. Трговците на мало имаат поголема моќ од производителите. Една од причините зошто отпадот е толку висок е нивното менување или откажување на нарачките, вели Истхоуп.
