Дечкото две години е овде кај нас, јасно е дека ја сака и земјата и луѓето но има една забелешка која му е на место: Македонците се многу пољубезни кон странци отколку меѓу себе. Факат. Би можеле да мозгаме зошто е тоа така но и не мора. Доволно е да се научи лекцијата: третирајте се барем како странци, многу пољубезна атмосфера ќе се направи. Сообраќајот башка. Што е таа нервоза, што е тоа брзање, милионите ли ќе ви пропаднат?  

Линеарното зголемување на пензиите ќе ни натовари нови 4 милијарди евра долг во следните 10 години. Тоа е цената што ќе ја плаќаат идните генерации за остварување на предизборното ветување и доаѓањето на власт. Наместо да плачат што ги заглавиле своите наследници, уште и се радуваат.

Жената разумно го сумира нивниот долг заеднички живот, имало тешки моменти кои требало заедно да се пребродат, имало и убави моменти а најважно од сè, вика, е кога меѓу двајца има разбирање и почит. Но, сликата за нивниот брак станува 3Д дури откако таа ќе заврши па ќе му рече и тој да каже нешто.

„Чудо или природен феномен?“ загадочно скокотка насловот на овој штипски ТВ прилог за нешто што се појавило на пресечено дрво. Што тоа? Куче! Досега стандардно се појавуваше сонцето од Вергина (дека сме прастари), ликот на Тоше (дека е ангел) или Богородица (дека жени секогаш биле по селфи). Ова со кучево или е знак дека (не) сме село без кучиња или пак потсетување дека куче што лае - не каса.