Bookbox › Набрзинка

Недела на јапонски филм во Кинотека

23 ноември 2024

Кинотеката на Македонија го отвара својот простор и платно за циклус на јапонски филм, нудејќи „патување“ низ повеќе декади на јапонската кинематографија од 25 до 29 ноември.
„Циклусот на јапонски филмови е еден од најзначајните филмски настани во годината, кој носи ретка можност за македонската публика да се запознае со длабочината, комплексноста и уникатната естетика на јапонската кинематографија. Овој циклус нуди не само визуелно задоволство, туку и увид во културните, историските и социјалните промени што го обликуваат јапонското општество“, велат од Кинотека.
Како што наведуваат оттаму, програмата се состои од разновидни филмови кои опфаќаат жанровска разноликост – од драмски филмови до анимирани дела и експериментални форми, претставувајќи ги новите имиња и таленти на јапонската кинематографија.

Целата програма со синопсиси тука.

извор

Читачки клуб од Куманово функционира 13 години и досега прочитале 143 книги

24 декември 2024

Во интервју за „Блен“, Наташа Атанасовска, преведувачка и ентузијастична читателка, раскажува како во далечната 2011 со неколку пријателки формирале читачки клуб во Куманово кој функционира веќе 13 години.
„Секој месец по една членка на клубот нуди книга која или ја прочитала и многу ѝ се допаднала или ја заинтригирала или, пак, непрочитана книга која делува интересно и има добри критики. Почнуваме со предлозите на најстарите членови, а потоа на најновите и така ротираме секој месец. Исто така, се обидуваме да вклучиме автори од разни држави и од разни ери“, вели Наташа.
Средбите ги одржуваат во живо, во помирно кафуле или ресторан, а во текот на КОВИД секој месец се среќавале на ЗУМ. Во моментот ја читаат нивната 143-та книга, „Невообичаена убавина“ од Лидија Манатоја.

извор

За конзервативните и авангардните гениталци

13 декември 2024

Во нова колумна на Венко Андоновски објавена во Нова Македонија, тој се занимава со односот меѓу моќта - идеолошка категорија и телото - биолошка. Крајната цел на секоја тоталитарна идеологија е да го покори телото, затоа што телата се тие што маршираат во воен строј, водат војни, гласаат и можат да се управуваат.
Тоа најдобро се гледа врз примерот на гениталиите, кои се епицентар на судирот меѓу билогијата и идеологијата, судир на телото со моќта. Но што кога паланката трпи недостиг од тела, односно материјал врз кјо би можела да ја тренира својата дисциплина? Што се случува кога другиот тип паланчани (откако поминале една ноќ во големиот град или во мотелот на половина пат) ќе отрикјат дека гениталиите можат да служат и за задоволства и уживање, а не само за репродукција?
„И, додека овие две паланечки војски (отелотворени дури и во спротивставени партиски „програми“) водат војна околу функцијата на гениталиите, речиси никој не гледа дека и едните и другите со своите радикални ставови предизвикуваат ист ефект: масовно иселување на младите. Не гледаат дека гениталиите, кај гладниот и безработниот, немаат смисла ни како извор на уживање ни како „алат“ со кој се гарантира опстанокот на „родот“. Човек со празен стомак ниту помислува на деца и семејство ниту на „бесполезен“ оргазам. И така, си се сменуваат на власт „конзервативните гениталци“ и „авангардните гениталци“, а нашите деца секојдневно се иселуваат, без разлика дали сакаат со гениталиите да создадат семејство или да уживаат во нив.“

извор