Bookbox › Набрзинка

На 56 години почина Шинед О’Конор

26 јули 2023

Најпозната по хит-синглот „Ништо не се споредува со тебе“ од 1990, напишан од Принс, Шинед О’Конор имаше 10 студиски албуми, а беше и гласна во изразувањето на своите политички гледишта. Засега нема детали за причините за нејзината смрт.
Во 1992 таа ја скина сликата на папата Јован Павле Втори на американското шоу Saturday Night Live каде настапуваше. Ова заврши со доживотна забрана за нејзини гостувања на NBC и протести на кои беа палени нејзините плочи.
Во 2018 премина во ислам, земајќи го името Шухада, но продолжи да настапува под своето родено име. Минатата година почина нејзиниот 17-годишен син, најверојатно како последица од самоубиство. По ова таа ги откажа сите настапи во живо.

3 април 2025

Утре (петок, 4 април) во Градската библиотека „Браќа Миладиновци“ – Скопје ќе се одржи разговор со писателот и преведувач Владимир Јанковски, чиј роман „Ехото на акробатите“ е книга за месец април во сите библиотеки од мрежата на ГБСК. Разговорите со домашни автори, книгата на месецот и клубот на читатели се препознатливите елементи на големата кампања „Читаме современи македонски автори“.
Модератор ќе биде Александра Јуруковска, а фрагменти ќе чита актерот Андреј Серафимовски. Настанот ќе се одржи во 19 часот во спомен-собата „Т’га за југ“.
Јанковски за оваа книга ја доби наградата „Пегаз“ за најдобар необјавен роман во 2024 година, признание што го доделува издавачката куќа Арс Ламина.

31 март 2025

Второто издание на фестивалот за литература и општа култура „Видик“ ќе се одржи од 2 до 16 април 2025 во организација на „Литература.мк“. Тој се отвора во среда (2 април) во 19 часот во книжарницата во Дајмонд мол со промоција на новиот роман „Три Марии“ на Оливера Ќорверзироска. Следат 15 уникатни настани кои се спој на литература, музика, театар, дизајн и филм.
Средствата од продадените билети за музичките и театарските настани ќе бидат донирани за настраданите во несреќата во Кочани.
Присуството на музичките и на театарските настани е со влезници и со резервации на 070 391 100.
Повеќе детали за целосната програма тука