Bookbox › Набрзинка

Фестивалот на јадење книги се враќа!

10 мај 2023

Фестивалот на јадење книги со еднодецениска традиција се враќа, и тоа на нова локација - Цреша Бар. Темата на изданието број 11 е „Јапонија во моето срце“ - книги од и за Јапонија од секаков жанр, вклучително и манги. Настанот е поддржан од Japan@mk.
Ако до сега не сте учествувале, правилата на фестивалот се едноставни: подгответе нешто за јадење, пиење, грицкање, „лапни-голтни“, благо-солено-луто-умами, што асоцира на писател, лик или наслов на книга, напишана од јапонски автор или таква која има врска со оваа земја. По изложување на делата, публиката гласа, а потоа истите се дегустираат. Наградите се скромни но шизички.

Датум: 20.05.2023 од 12 часот (гласањето ќе започне во 13.00)

Место: Цреша бар | Cresha Bar

На линкот, галерија од последното физичко издание на фестивалот на тема „Книги и музика“, за инспирација.

извор

Мушички ќе летаат со дијаманти во МКЦ

12 мај 2026

Изложбата „Мушичката лета со дијамантот“ на Марија Милошевска, со која таа одбележува 20 години креативна работа, ќе биде отворена на 12 мај (вторник) во 20 часот во МКЦ. Таа е замислена не само како естетски чин туку и како длабоко метафизичко истражување на човечката состојба.
Овој концепт се заснова на тензијата помеѓу привременото (мушичката) и бесконечното (дијамантот). Тоа е метафора за човечката природа – нашата постојана борба меѓу потребата да оставиме траен белег и свесноста за сопствената минливост.
Изложбата е збогатена со музички перформанс на Јордан Костов и неговиот бенд.

извор

Енди Кенеди, дизајнерот на звук на „Гејм оф тронс“ и „Хари Потер“ во Скопје на 7 мај

6 мај 2026

Во рамки на одбележувањето на 20-годишнината од постоењето, Агенцијата за филм на Македонија започнува серија ексклузивни мастеркласови со врвни светски професионалци од филмската индустрија. Првиот настан ќе се одржи на 7 мај (среда) со почеток во 11:00 часот во Cineplexx.
Гостин-предавач ќе биде Енди Кенеди, еден од водечките светски експерти за дизајн и монтажа на звук, добитник на престижните Еми и Бафта, со повеќе од три децении искуство во индустријата. Неговото богато портфолио вклучува работа на Game of Thrones, Bohemian Rhapsody, The Crown, Batman Begins, Harry Potter, The Imitation Game и Fantastic Mr. Fox.
Мастеркласот ќе понуди уникатен увид во процесот на создавање на звучен идентитет, како и во клучната улога што звукот ја има во филмското раскажување. Настанот е наменет за филмски професионалци, студенти, но и за сите љубители на седмата уметност.
Предавањето ќе се одвива на англиски јазик, а влезот е бесплатен со задолжителна претходна регистрација. Бројот на места е ограничен.

извор