Доделена пародичната награда „Трупка“ за 2023-та
8 декември 2023
- Добитник на овогодишната пародична награда „Трупка“ (Turnip Prize) за уметничко дело направено со минимален напор и евтини материјали е господин Кип Калм со инсталацијата „Парти гејт“. Делото се состои од железна ограда (извадена од вистинска порта) и на неа закачена хартиена роденденска капа.
- Оваа година се навршуваат 25 години од воведувањето на наградата за која често сме известувале (за минатата година види тука). Таа е сатира на престижната награда Танер која ја доделува лондонската галерија Тејт.
- Кип Калм, што е веројатно псевдоним, е државен службеник и само еден од 193-те автори кои се пријавиле со свои дела. Тој ја добива наградата - вистинска репка поставена на дрвена основа, од организаторите, хотел и ресторан во Сомерсет, Англија.