Bookbox › Набрзинка

Да му помогнеме на „Антолог“!

3 јули 2026

„Антолог каков што го познавате и го сакавте - повеќе не постои“ - вака почнува објава на Книжевниот центар Антолог по големото невреме што го зафати Скопје неодамна, а кое заедно со несоодветната изведена канализација во регионот на Кисела Вода предизвика голема материјална но и емотивна загуба не само за оваа издавачка куќа, туку и воопшто, за македонската јавност.
За да се ублажат последиците од штетата која уништи магацин, целосниот инвентар (дури и книги што уште не се влезени во продажба), техника и возило, започна солидарна акција за помош.

Еве како може да се помогне:

– Со купување на моменталните резерви на изданијата на „Антолог“ достапни во книжарниците на линкот (со тоа што книгите нема да можат да бидат доставени веднаш).

– Помош со механизација за расчистување на просторот.

– Привремено бесплатно отстапување на магацински простор. Контакт телефони на „Антолог“: (+389) 75 228 984, (+389) 2 6169 150

– Со директна финансиска помош на нивната денарска и девизна сметка.

АНТОЛОГ – БООКС ДООЕЛ СКОПЈЕ
ул. Ѓорѓи Пулевски бр. 29-лок.1
Единствен даночен број 4080014541495
Жиро сметка 300000003674784
Депонент на Комерцијална банка а.д.

извор

На 88-годишна возраст почина писателот Јован Павловски

24 јуни 2026

Денеска (24.06.) во Скопје почина Јован Павловски, македонски енциклопедист, поет, раскажувач, романописец, писател за најмладите, публицист. Во три мандата беше претседател на Друштвото на писателите на Македонија, долгогодишен уредник на повеќе рубрики во „Нова Македонија“, нејзин дописник од Париз и Москва.
Јован Павловски е роден во Тетово, на 10 септември 1937 година. Од 1980 до 1986 г. е професор по теорија и практика на новинарството на Интердисциплинарните студии по новинарство на Универзитетот „Кирил и Методиј“ во Скопје. Член на Друштвото на писателите на Македонија од 1962 год, во три мандати (1992-1994, 1994-1996, 2007-2008) негов претседател, член на Македонскиот ПЕН центар.
Автор е на педесетина книги проза и поезија, меѓу кои култниот роман „Сок од простата“, која веднаш по појавувањето во 1990 година, ги разбранува литературните и културните води во Македонија. Како публицист, потпишува редица книги главно поврзани со конструирањето на македонскиот идентитет и борбата на Македонецот за сопствена држава. Како енциклопедист е главен уредник на Личности од Македонија (Петар Карајанов, Христо Андоновски, Јован Павловски, соавтор и уредник, 2000, најдобро издание на Меѓународниот скопски саем), Сто македонски години (група автори, соавтор и уредник, 2003, најдобро издание на Меѓународниот скопски саем), „Ми-анова енциклопедија, општа и македонска“, во четири тома (група автори, соавтор и уредник, 2006, најдобро издание на Меѓународниот скопски саем), Кратка Ми-анова енциклопедија, ликовна уметност (2007, група автори, соавтор и уредник Јован Павловски), четири тома хронолошка енциклопедија за историјата на Македонија од неолитот до 2003 г., група автори, соавтор и уредник: Јован Павловски) и други.

извор

Уште успеси на наши луѓе

23 јуни 2026

Од јули 2026 проф. Мирко Трајковски, по потекло од Скопје (попрецизно - Буњаковец), со завршен Фармацевтски факултет на УКИМ, е Директор на Одделението за клеточна физиологија и метаболизам при Универзитетот во Женева. Тој е професор на Факултетот по медицина на истиот универзитет од 2013.
Проф. Трајковски раководи со интердисциплинарен истражувачки тим кој се занимава со најнови експериментални технологии и ин витро модели за да се открие како метаболитичките процеси влијаат врз сложени болести вклучувајќи дијабетес, прекумерна тежина и рак.
Тој и неговиот тим развиле иновативен метод за откривање на колоректален карцином преку анализа на бактериите во цревниот микробиом, кој е многу помалку инвазивен и речиси подеднакво точен како колоноскопијата.

Подетално за патот на Трајковски во интервју за факултети.мк од 2017.

извор