Навивачите на Ајнтрахт Франкфурт се надминаа себе си

Ги фалевме цела сезона, бидејќи одеа во ненормална бројка на секое гостување и грмеа на секој стадион во Европа како да се домаќини. Новата сезона нема абер да почне, не знаат дали сигурно ќе играат на меѓународна сцена, ама карта не оставија ниту за лек.

Германската навивачка култура веќе немаме идеја како да ја опишеме и пофалиме и таа дефинитивно е број 1 во светот.

Замислете на 25 јули Ајнтрахт Франкфурт ги стартува европските настапи од новата сезона, а карти веќе нема, барем сезонски. На 25 јуни или на точно еден месец пред мечот, клубот ги продал сите 40.000 сезонски влезници за Лига Европа. Значи не 10-20.000, туку 40.000.

Продажбата одела вака. Прво имале предност сопствениците на годишни карти за натпреварите од Бундеслигата кои разграбале 26.000 комада, а потоа за само три часа ги купиле останатите 14.000. Какви луѓе се овие.

Е сега најјакото во муабетов е што на навивачите никој со 100% сигурност не им гарантира дека нивниот клуб ќе игра во Лига Европа, бидејќи заврши седми на табела и ќе почне од квалификациите.

Ајнтрахт на 25 јули ќе игра на гости со победникот од дуелот Раднички Ниш – Флора Талин и со тоа ќе стартува од второто квалификациско коло. Од реваншот на 1 август заклучно со нокаут фазата навивачите може да гледаат максимум 10 натпревари на домашен терен.

За да влезе во фаза по групи прво треба да го мине второто, третото квалификациско коло и плејофот, ако не џабе парите.

Но навивачите веруваат во своите миленици кои изминатава сезона стигнаа до полуфинале каде беа елиминирани од Челси и затоа клубот излезе со импресивно соопштение во кое стои: SOLD OUT.

Каква верна банда е ова.