Нестварен кошаркарски финиш во режија на Грузија невиден во историјата

Европско првенство, Копа Америка, Вимблдон, Квалификации за Олимписки игри. Имаме богато спортско лето со најнеобичен крај некогаш виден во кошарка. Грузија нека се радува на фудбалските успеси и нека не ги гледа своите во кошарка. Па за ова е потребно време човек да го свари и после три гледања.

Во кошаркарските квалификации за пласман на Олимписките игри, Грузијците направија пацерски потег од невидени размери и останаа без учество во Париз 2024.

Откако во својата квалификациска група се соочија со дебакл од 88:53 против Летонија и за да се пласираат во полуфиналната рунда им требаше триумф над Филипини од 19 поени разлика.

Во еден момент на стартот на втората четвртина имаа водство од 40:20, но на крајот работите на семафорот не одеа во нивна полза.

На 2,8 секунди до финишот имаа предност од само 3 поени разлика, како и две слободни фрлања за кошаркарите на Филипини. Првото го погодија, а второто го промашија и резултатот беше 94:96.

Гога Битадѕе скокна во обид да ја забие и да си даде автокош, но несреќниот го направи невозможното и промаши.

Зошто автокош? За да постигне два поени, доволни за 96:96 и продолженија во кои Грузија би бркала победа од 19 поени разлика. Циркуз Медрано.

Селекторот на Грузија Александар Ѓикиќ, кој ги води од јануари и кој пред 10 години ја водеше Македонија, не можеше да поверува што гледа.

Филипини во полуфинале ќе игра против Бразил, а ако победи оди на подобриот од дуелот Камерун - Летонија.

„Ова е прв пат да се чувствувам добро после пораз и сакам да им честитам на момците. Паднаа на 20 поени негатива и лесно можеше да дојде до паника, но се вратија во играта“, изјави селекторот на Филипини, Тим Кон.

Инаку верувале или не, Гога Битадѕе има играно во НБА. 

5 јули 2024 - 11:54

Штета ако сте пропуштиле

Нетфликс стигна, баба се чешла

Пинк Флојд за Кочани

Кирил, Методиј и Зоре

Видлива и невидлива Македонија