Во ESSA членуваат водечките интернет кладилници Bet-at-home, Bet365, Betclic, bwin, Digibet, Expekt, Goldbet, Interwetten, Ladbrokes, Paddy Power, Sportingbet, Stan James, Stanleybet, Unibet и William Hill, а под нив спаѓаат и 7.000 локални кладилници во Велика Британија.
Според нивните податоци, во 2012-та година биле забележани 109 сомнителни фудбалски натпревари, а по деталното испитување на информациите, само за 6 од овие натпревари биле пронајдени докази по што биле алармирани властите. Претходната година биле забележани 8 вакви случаи.
Но главниот проблем не е кај водечките европски кладилници, туку кај нелегалните кладилници во Азија. Затоа тие повикаа на поголема ангажираност од страна на властите и раководните лица во спортот.
Голем проблем кој им ја олеснува работата на местачите е доцнењето на платите на фудбалерите со што тие стануваат лесно поткупливи. Според извештајот на Унијата на професионални фудбалери FIFPro од 2012-та година, на 41,4% од анкетираните фудбалери од источна Европа им доцнеле платите, а 33,7% за својата плата требале да чекаат и до 6 месеци.
