Самсоненко се повлекува од Вардар, картите намалени на 300 денари

Сопственикот на Вардар утрово неочекувано преку соопштение ја информираше јавноста дека ја напушта раководната функција од трите клуба кои под закрила на спортското друштво Вардар беа во негова сопственост.

Сергеј Самсоненко во соопштението кое прво го објави Македонски Спорт напиша:

Почитувани граѓани на Македонија, пријатели!

Вчеравечер се вратив во Скопје и бев длабоко вознемирен од сето она што го прочитав во медиумите, на социјалните мрежи, порталите... Првото прашање што си го поставив себеси беше со што  јас и моите колеги од Вардар заслуживме вакви навреди? 
Македонија е дом за мене и за моето семејство веќе 11 години, во овој период од срце инвестирав огромни средства во развој на спортовите во земјава. Драги пријатели, цената на ниту еден билет не може ниту, пак, сакам да го врати тоа што го вложив без никаква задршка во македонскиот ракомет, фудбал, тенис и друго... токму поради тоа јас, од мое име и од името на управата на ФК Вардар, донесов одлука. 
Долго време се воздржував да реагирам на навредите што ги пласираа против мене одредени медиуми и поединци... и сакам да кажам, доста е! Никогаш во животот не сум доживеал ваков линч, навреди и омаловажување какво што доживеав во изминативе денови. 
Ви благодарам многу, се чини дека ова е  надомест за  сè  што направив. Доста е, одлуката, колку и да ми беше тешко, ја донесов. Ова е последна сезона во која јас, Сергеј Самсоненко, како инвеститор вложувам во сите три спортски клуба во Македонија. По оваа сезона, ќе ги вратам трите клуба на поранешните сопственици во одлична состојба, со шампионски титули, добар ранкинг и без долгови. `
Во врска со билетите за натпреварот Вардар-Фенербахче, одлучив да ги продаваме сите билети по единечна цена од 300 денари, без разлика на сектор или трибина. На сите кои купиле билет по стара цена, средствата ќе им бидат рефундирани. 
Напред Вардар! 

Сергеј Самсоненко

Реакцијата на Русинот следува по целата заврзлама околу првичното решение на управата на Вардар за мечот со Фенербахче да отстапи дури две трибини на гостинската публика а цената на картите да биде по 2.000 и 3.000 денари после што навивачите на клубот бурно реагираа и најавија бојкот.

11 август 2017 - 11:09