Екс претседателот на Реал беше хоспитализиран неколку дена откако качи температура, но состојбата му се влошила и поради проблеми со инфекција на бубрезите не успеал да го победи коронавирусот.
76 годишниот Санц лежел на интензивна нега и се зборува дека имал осум дена температура, но лекарите не успеале да го спасат.
Тој стана претседател на Реал Мадрид во 1995-та година и на клубот му донесе две титули во Лига на шампиони. Прво во 1998-ма после пауза од 32 години и потоа во 2000-та. Во финале беа поразени Јувентус и Валенсија.
За време на своето владеење донесе играчи како Роберто Карлос, Кларенс Сидорф, Давор Шукер и Предраг Мијатовиќ, а на клупа го ангажираше Фабио Капело.
Но и покрај две врвни достигнувања во клупскиот европски фудбал, не успеа да ги покрие финансиските проблеми и на претседателските избори после втората титула во 2000-та загуби од Флорентино Перез.
Веста за неговата смрт ја соопшти неговиот син Фернандо, кој беше играч на Реал 1996-1999, а потоа кариерата ја заврши во Малага каде настапуваше седум години.
