Голманот на колумбискиот прволигаш Атлетико Букараманга, Луис Делгадо го преживеал најтешкиот период во својот живот. Луис лани паднал на допинг и го отстраниле од фудбалот на цела година.
Летово од рак на градите починала неговата жена Татјана Гарсија. Таа се борела со болеста шест години, а загубата ја преживеал и нивниот син Матијас.
На Матијас извесно време му недостигало вниманието од татко му кој многу тешко ја поднел загубата на сопругата.
Едно утро малиот Матијас оставил писмо на својот кревет:
„Тато,
Сфаќам колку ти е тешко без мама, но знај дека јас секогаш ќе бидам со тебе и многу те сакам. Ти ми даваш сè што сакам. И јас исто.“
Под овие зборови малиот се нацртал себе, татко му и мајка му.
Писмото му дало на Луис Делгадо нови сили да продолжи понатаму во животот. За да го овековечи сеќавањето на својата жена и својот син, фудбалерот направил тетоважа иста како писмото.
Минатиот викенд Луис се вратил на голот на Букараманга откако во 73’ минута влегол од клупата наместо првиот голман Агире. Неговиот тим Атлетико Букараманга игра одлична сезона и после 16 кола е втор со исто бодови (32) како и првопласираната Толима. Букараманга има серија од пет победи.
После натпреварот новинарите го пронашле малиот Матијас кој раскажал за писмото:
„Пред мечот тато ми кажа дека направил тетоважа со моето писмо, а после мечот помислив дека мајка ми би ми кажала да одам на терен и да го гушнам. Среќен сум што тато пак игра после тоа кога падна на допинг за што ние бевме многу тажни, но мама секогаш го поддржуваше тато и знаев дека ќе се врати на терен. Знам дека сите деца имаат најдобри татковци и знам дека тато е борец и дека ќе се држи до крај“, рекол малиот Матијас.
