Диего Армандо Марадона за последен пат се појави на стадионот во својот роден град на 8 март годинава. Го опишуваа како подуен и мелодраматичен, а се движеше тешко и тромаво. Пред да излезе на осветената трева на Ла Бомбонера, двајца го држеа под рака.
Дојде дома, но како гостин и тренер на Гимназија ла Плата која во последното коло од аргентинскиот шампионат и гостуваше на Бока Јуниорс. На домаќинот му беа неопходни 3 бода за титула, но само ако Ривер Плејт киксне.
Навивачите беа во транс. Марадона е во градот. Доби овации какви што можат да се чујат само во јужноамериканскиот фудбал. Гласни, бес престан. Тие извадија голем банер, а управата му спреми дрес и плакета.
Тој ден ќе остане незаборавен за Бока и нивните навивачи кои направија шоу. Тие на трибина, а Карлоз Тевез на терен кој со бакнеж ја поздрави легендата, а потоа со гол во 72-ра минута го реши мечот и донесе титула. Ривер не успеа да победи на гостувањето против Атлетико Тукуман.
Нема навивач на Бока кој ќе го заборави 8 март 2020. Титула освоена во последно коло против градскиот ривал и појавување на Марадона, за жал последно, кој за нив играше прво во 1981/1982, па 1995-1997 за крај на кариерата.
