Натпреварот помеѓу Виљареал и Барселона од Ла Лига најверојатно ќе стане првиот од шпанското првенство и општо од европскиот фудбал кој ќе се игра во САД.
Се работи за меч од 17. коло кој е моментално закажан да се игра на стадионот „Естадио де ла Керамика“ во Виљареал на 21 декември.
Шпанската фудбалска федерација одобрила тој да биде преместен на стадионот Хард Рок во Мајами, кој инаку ќе биде домаќин на седум натпревари од Светското првенство 2026.
„На состанокот на 11 август 2025 година, одборот на директори на РФЕФ доби барање од Виљареал и Барселона да го играат својот натпревар од 17-то коло во САД. Шпанска фудбалска федерација ќе го поднесе барањето до УЕФА за да започне процесот за последователно овластување од ФИФА за натпреварот за да се игра на стадионот „Хард Рок“ во Мајами на 20 декември 2025 година“, стои во соопштението на Фудбалската федерација на Шпанија.
Здружението на шпански фудбалски навивачи им се придружи на навивачките групи на Барселона и Виљареал за да го изразат своето цврсто противење.
Во заедничка изјава, тие го повикаа и националниот спортски совет, како што велат „да го спречат ова лудило“, предупредувајќи дека ќе „преземат соодветни правни мерки“ доколку се реализира.
Вакви примери до сега имаше во Суперкупот на Шпанија и Италија, кои последните години натпреварите ги играат во странство.
Минатата година, од Ла Лига изјавија дека сакаат да го организираат натпреварот Барселона - Атлетико Мадрид во Мајами, но се откажаа од идејата поради временски ограничувања.
Во 2019 година, Барселона планираше да организира натпревар против Жирона во Мајами, но идејата беше отфрлена по противењето на федерацијата и синдикатот на играчи.
Во 2008 година, тогашниот извршен директор на Премиер лигата, Ричард Скудамор, предложи да се игра дополнителна рунда натпревари во странство, но плановите беа одложени по критиките од навивачите и медиумите.
Милан се надева дека ќе го игра својот натпревар од Серија А против Комо во Перт, Австралија, во февруари, бидејќи тој се совпаѓа со церемонијата на отворање на Зимските олимписки игри на Сан Сиро.
Сепак, плановите сè уште не добиле одобрение од ФИФА, УЕФА, како и фудбалските тела на Австралија и Азија.
Правилата на ФИФА моментално не дозволуваат натпревари од домашните лиги да се играат во странство, но минатата година формираше работна група за да го разгледа ова прашање.
