Off Topic

Некои луѓе имаат време. И тонер.

Еден обожавател на филмската франшиза „Дина“ испечатил 240 постери со кадри од својот омилен филм и ги поставил по прецизен редослед покрај еден пат. Зошто? За кога некој ќе помине со возило покрај овој дел со одредена брзина, статичните слики покрај патот да му се спојат во течна анимација и „да му направат филм“. Океј.

Водич за пиење од Леми Килмистер

Уште во 2005 година, пејачот и фронтмен на Моторхед, Леми Килмистер, во интервју даде неколку тешко стекнати совети за пиење алкохол. Тој отсекогаш важеше за исклучително веродостоен извор по ова прашање. Има тука неколку интересени цаки.

Новиот српски парламент има пратеник со боенка

Во новиот состав на парламентот на Србија има осум глумци, пола од кај студентите, пола од кај Вучиќ. Еден од кај студентите е и актерот Бојан Димитријевиќ, познат како наркоманот Пикац од серијата „Вратиће се роде“. На првиот ден на новата работа земал боенка, за кога ќе му биде досадно. Симпатично, ако човек заборави дека се колнеа како 24/7 неуморно ќе се борат со криминалниот октопод на претходната власт.

„Подобрата Србија“ демонстрира простаклук

Група победнички бадијалџии се собраа пред зградата на српскиот парламентг каде се одржува конститутивна седница на новиот парламентарен состав. За да им аплаудираат на своите и да викаат „уаа“ на другите (јаки потези, јаки герили). Најглупата меѓу нив ја потури со јогурт по глава актерката Лидија Вукиќевиќ која има мандат од СНС.

ВИ музиката ги доби своите Греми

Во Лос Анџелес биле одржани првите AI Music Awards за музика креирана со вештачка интелигенција. Распоредени во 25 музички жанра и три категории: скроз ВИ, делумно ВИ и хибридни песни во кои вокалот е на клониран човечки глас. Влез за настанот бил 250 долари. Ги имаме победниците. Некако ни немаат душа :)

Политичар е за да те фарба

Во 2021 година, локални политичари во изборна кампања решаваат да им покажат на своите гласачи дека тие се луѓе од народот па наместо само ветувања, да демонстрираат дека се подготвени конкретно да им помагаат на луѓе. На пример, да освежат со боја фасада на една скромна куќа, па удираат ваљак, се разбира, пред камери и новинари. Да ја видите куќата пет години подоцна.

Еволуцијата бара вакви

Руски момчиња решиле без брзање да ни објаснат како може да се наполни мобилен телефон со помош на напонот од шините. И ние не брзаме, брза некој воз кој во следната прилика ќе го оправда насловот на оваа статија. 

Од состанокот на црнците комичари

Седеле Кат Вилијамс, Кевин Харт, Дејв Шапел, Крис Рок, Трејси Морган, Крис Такер и Берни Мак, кај Еди Марфи дома. Сè понатаму ќе раскаже Џеј Фароу.

Статија за човек и пијано

Глен Гулд ветуваше дека кога ќе наполни 50 години, ќе го остави пијаното и ќе се посвети на сосема други работи. Два дена по 50-от роденден, телото се спротивстави на ваквите планови.

Спремни за Олимпијада?

За сите што планираат да одат а и нас нè лакомат летоска да зашибаме за Рио, 12 минутна показна вежба за тоа што ги чека на улиците на овој град.

Плејбој, постхумно

Кога некој ќе замине, остануваат блиските да се сеќаваат на нивните дела. Откако Плејбој реши да ја упокои голотијата, ние ужалените решивме да ги собереме сите - ама баш сите - одбрани убавици, кога било објавени на страните на овој магазин.

Приказна за лека ноќ

Една кратка и веројатно многу неефикасна приказна за заспивање. Чита Џенифер Гарнер.

Бизнис на денот

Мелани и Фрaнческа одат по ливади со онакво како за фаќање пеперутки и собираат воздух. И потоа воздухот го ставаат во тегла. И потоа продаваат. 115 долари за тегла. Не се жалат.

Кога на претседателски кандидат му ставаат зборови во уста

Ако мислите дека ова е лесно имајте предвид дека: треба да му најдете текст кој ќе изгледа како автентично да го кажува, на лице да изгледа како да верува во тоа што го зборува и сите негови постапки и движења да одговараат на тоа што го зборува. Хм...

Пар работи за богатството на Ворен Бафет

Не само што богатството на Ворен Бафет е импресивно туку е уште поимпресивно колку долго тој успева да ја победи берзата. Во 43 од 46 години тој и неговата компанија е подобра од индексот S&P 500. И затоа денес неговиот новчаник изгледа вака.   

Кога комичари би пишувале порно сценарија

Најслабиот дел од порното се дијалозите. Не дека некој се буни заради тоа но ова е добар обид да се поработи на проблемот. Двајца комичари им кажуваат реплики на овие што се бембаат и на моменти тоа знае да биде урнебесно. 

Порно проблеми што не ги разбираат луѓе што не работат порно

Порнсуп е веб-серијал на Порнтјуб во кој главни ликови се Мануел и Кајли, брачен пар кој речиси сме сигурни дека ги знаете и само по име, иако може не знаевте дека се во брак. Во серијалот двајцата најчовечки расправаат за проблемите во порно еснафот.

Љубов на ескалатор

Скриената камера како ретко одвратен телевизиски производи (што, сакаш да кажеш тебе не ти е смешно што те правиме мајмун пред камера???) е едно од поголемите зла што можат да ти се случат во текот на денот (#firstworldproblems). Технички дефиницијата го опфаќа и следново видео, ама па не е сè во дефиницијата.

На шефицата, мамицата

Шефот/ шефицата сигурно не ви се згодни како Софија Вергара ама ќе ви дојде да ги гушнете. За што се работи? Еден дечко цели 3 години ѝ е личен асистент и Вергара конечно решила (за потребите на кампања!) да го почасти: бонус (непознат), костум (комада 1) и слободен ден (комада 1). И овој кутриов ќе се распадне од толкава добрина.

Ни брат Љубе* вака не се извинуваше

Како Северна Кореја ПР-овски  му ја извади маста на американскиот студент обвинет затоа што украл некое знаме со политичка парола. Откако покајнички се изнарика пред цел суд, 21 годишниот пишман изјави дека тоа е "најголемата грешка во неговиот живот" и дека на таков чин го "охрабрила католичка црква поддржана од американската влада".  

Органски бетон кој сам си ги лечи пукнатините

Истиот процес со кој настануваат пукнатините во бетонот (на чии поправки во ЕУ годишно се трошат 6 милијарди долари), искористен за нивно пополнување. Во цементот се уфрла бактерија која може да мирува 200 години ама ако ѝ наиде вода, ете ја неа на работа. Просто, генијално.

Потеклото на иксот

Не потеклото на буквата, туку потеклото на нејзината функција како симбол што означува нешто непознато. Како и куп други паметни работи што ги користиме ама поим немаме од каде доаѓаат, и на ова корените му се во арапскиот свет. П.С. Сте чуле за ал џабра? Нормално дека да, само што во не арапскиот дел од светот ја викаат - алгебра.

Географија по Џон Оливер

Се што треба да знаете за државите низ светов слободно може да почнете да го учите од Џон Оливер. На лекциите паралелно се предава - географија, геополитика, историја и како им изгледаш на комшиите.

Плочата на Светлана Миљуш го освои Слеш

Во многу наврати сме ја споделувале нашата одушевеност од дизајнот на старите екс југословенски плочи (види ги препораките за Стевче). А веќе не сме сами, во бандата фанови се придружува и Слеш.

Пилешки сендвич без антибиотик

Сабвеј на времето тргнаа одлично, како поздрава и посвежа алтернатива за сендвичи. Но, на шемата "здравје" се налепија и други играчи и работата отиде надолу. На пример, во 2014-та продажбата им паднала за 3 проценти иако истата година отвориле 778 нови продавници. Сега најавуваат пресврт во нивното мени, ќе биде без антибиотици. Иако и натаму би сакале нивните сендвичи да се јадат три пати на ден, 8X1, на гладно срце.

Непомирените

Кратка фото галерија од мажи кои не можат да се помират со фактот дека немаат коса ко некогаш. Па пробуваат да го маскираат проблемот со таканаречени "coast to coast" и слични досетки од фризури. И онда се гледа во огледало и вика, е сега е добро!

И роботите имаат душа

Музика и текст од реклама за заштита на животни, видео од тестови на роботи. До крај, ве остава завиени во тага  да не можете на тостерот во очи да му погледнете што толку сте го стискале.

Радост на денот

Возбуда од типот "чичко пушти летки." Деца од Африка за првпат гледаат дрон.