За тие што не го знаат, Нејт Силвер е страшно добар статистичар, кој спектакуларно многу утна годинава на претседателските избори, и ова не му е прв пат. Неговата одбрана е "јас ги земам бројките од анкетите, не ги правам анкетите". Прашањето од Ноа е, па што земаш глупи бројки.

Да имаше жена, ова ќе беше проблем кој треба веднаш да го реши. Без жена, нема никаков проблем. Напротив, ете прилика да се удри на песна.

После видеово, бабата во вас ќе си помисли "Дејвид сине, што не учеше школо да не треба вака да се мачиш?"

Едниот има 17 жени, другиот има една жена. Што мислите, кому му е смешно?

Во теорија исто е како да ставиш која било стара слика пред телефон и да ја сликаш. Во пракса Гугл го има малку разработено целиот систем, па те тера да фотографираш четири различни делови од сликата кои после го спојува во совршена копија.

Дечкиве зборат, ние гледаме. Тема: српска рејв супкултура. Ликови: тројца.

Првата опција е да му викаш, ама веројатно е дека само дополнително ќе се изнервираш, а он и понатаму нема да те слуша. Втората опција е да го тепаш, ама и покрај првичните успеси, на долг рок ќе бидеш во була. Третата опција, и за сега единствена која изгледа како да успева е - да го срамиш пред другарите / другарките.

Човеков со голи раце и без заштитна опрема чисти улични шахти и одводи од куќите, и без разлика колку е нечовечка и понижувачка работата во земја со над милијарда луѓе тој не може секој ден да најде ангажман, делумно и затоа што неговиот занает (во идентични услови) во земјата го работат уште 1,3 милиони луѓе.

Едни се родени за да владеат и имаат, а други за цел живот да бидат сиромашни, и што може тука да се направи; апсолутно ништо!

Цели 8 години Џим Џармуш и Иги Поп работеле на документарецот Gimme Danger, посветен на бендот Стуџис. За редовната музичка публика на коњопоите на Дежа Ву, Иги Поп е оној босиот, што значи останува Џармуш да е другиот.

Актуелниот потпретседател на САД, за време на кампањата во еден момент порача и дека би сакал да се проба со Трамп, еден на еден. Ова уште го држи и кога завршија изборите, и никако не му оди да му ја даде Белата куќа на новиот претседател.

Минатата година еден лик на интернет (успешно) се обидува да направи седнвич со пилешко од нула. На крај за целиот овој подвиг му требаат 6 месеци и 1500 долари (сè правеше од нула, од одгледување правење брашно за лебот за сендвичот до сушење на морска вода за да добие сол). Истиот овој сендвич инаку се продава за околу 2 долари (стотина денари). Бонус, британска репортажа од 70-те, за генерацијата Американци што никогаш нема да го осетат вкусот на вистинско пилешко.

На станица во њујоршко метро, стотици луѓе на стикери си ги пишуваат маките или се куражат меѓу себе дека победата на Трамп (можеби ) и не е крај на светот. Стикери? Кај нас на 12-ти декември со фломастери и хамери ќе се оди на автобуска.

Во онаа поговорка "И волкот сит и овците на број" мора да постои и некоја жртва која ни ја кријат.

По победата на Доналд Трамп, се огласи и Јоко Оно која зборовите ги замени со неколку препознaтливи тонови од нејзиниот музички опус.

Човекот што пред неколку години од позиција на водител на Дејли шоу, на најавите на Трамп дека ќе се кандидира за претседател од денешна перспектива наивно му порача „те молам, дај те молам кандидирај се“, во средата сабајле заедно со остатокот од Америка се разбуди со претседател Трамп. Бонус, совршено добар клип на Сатрдеј Најт Лајв за разочарувањето и заблудата на белците либерали (плус Дејв Шапел и Крис Рок) на вечерта на гласањето, околу сопствената земја и сонародници.

До граѓаните на Соединетите Американски Држави,
Во врска на вашиот неуспех да изберете компетентен претседател на САД и сами да се управувате, со ова ви се дава на знаење дека вашата независност е поништена, а одлуката е ефективна од денес.

„Либералите беа бесни на Трамп и го искажаа својот бес во сајбер-просторот. Тоа немаше никаков ефект бидејќи алгоритмите се погрижија тие да им се обраќаат само на луѓето што и онака се согласуваа со нив“, порачува Адам Куртис во својот документарец за Бибиси, Хипернормализација. Филмот е излезен во октомври, кога сè уште никому не му се верува дека Трамп воопшто е републикански кандидат за претседател на САД.

Клучно за снимката е што е направена на остров кој толку нема контакт со човечка цивилизација, што животните се уште немаат научено да се плашат од луѓето, па човек може да ги снима сред работа. Втора клучна работа е бебе игуана кое мора да мине преку змијско гнездо за да дојде до своите родители.

Веројатно единствена група на луѓе на кои им беше подеднакво тешко како и на Хилари да ја признаат победата на Трамп, беа водителите на ноќни шоуа низ САД. Сепак тие се помирија со тоа што се случи, кој колку може. Конан, Колбер, Би, Ноа...

Освен онаа финта со патентот, другиве  - многу досетливи! - бајпасирања на проблеми поврзани со облеката, досега не ни затребале. Ама па, прав маж никогаш не знае кога ќе посака сам да си го закопча вечерниот фустан.

Вие меѓу отровните коментатори по социјалните мрежи, Вие излезени во градот полн со локални јебачи и спонзоруши, Вие меѓу партиските ловци по приврзеници или непријатели.... Кој филм и да си го направите во глава, наравоучението е исто (види наслов). Би Би Си, претплатата да ти се позлати.

Или изгоревме за наука или изгоревме по зелката, која поради топлото време уште не е стасана. За првото: ви се верува дека американски научници три години претурале каци со зелки за да го најдат оптималниот начин за киселење?