Кога објавуваме дилајли кои пукаат додека пеат и слични балканштини, имаме чувство дека им нанесуваме бол на одредени свилени елитистички кругови кои се гадат од контрастите на ова поднебје. За некако да им се оддолжиме, им го нудиме овој традиционален шведски танц, да го пробаат некој пат на своите збиранки, за да покажат дека и овде може да се има високо скандинавско ниво. Само напред дечки, пикањето глава во нечие меѓуножје и онака веќе е навежбано.

Во теорија е здраво и практично. Во пракса е опасно (немаш секаде патеки, ниту пак сите „патеки“ се оптимизирани за велосипед), полно со стресови (бидејќи добар дел од времето возиш по улица зависиш од добронамерноста, фокусираноста и смартфон активноста на луѓето со кола) и не баш здраво (по пат го вдишуваш целото олово од твоите моторизирани сограѓани). И покрај ова, пак некако, барем кога е убаво времето, велосипед е неспоредливо подобра опција од автомобил.

Некаде 1973-74, Тајланѓанка во кафана во Бангкок става во казан да се прави говедска чорба. Три генерации подоцна нејзините наследници (жената уште е жива и здрава, фала на прашање) се уште служат од истиот казан и од истата чорба.

И покрај целото наше натежнување накај рок музика, и малку поблаго накај метал, чувствуваме дека до сега не сме одвоиле доволно простор за - деткор метал. Ако сакаме ова да се поправи, а сакаме, зошто тоа не би почнало со Аца Лукас.

Малку очекувано ама деновиве беше објавено дека „Медена земја“ се прикажува во американските кина. Идентично малку очекувано рецензија за документарецот извадија Ролинг стоун магазинот и Вокс, притоа и двата автори прилично воодушевени од тоа што го изгледале.

Тоа што Борис Џонсон стана премиер на Британија не изненади апсолутно никого, бидејќи сите го чекаа неизбежниот момент уште од денот кога Тереза Меј се всели во премиерската резиденција. Сега Џон Оливер прави профил за новиот премиер на неговата родна земја, која без разлика на жестината најверојатно повеќе ќе му помогне на Џонсон, отколку што ќе му одмогне.

„Човек ми кажа, он со свои очи има видено....“ е една од честите форми со кои им се дава уверливост на рекла-казала муабетите. Кога ќе се пуштат во оптек, на крајот на ланецот секогаш испаѓа нешто сосема друго.

Искуството ни кажува дека паркирачкото дивјаштво не може да се скроти ни со јавно исмевање, ниту со добронамерни пораки ниту со заканувачки пораки (од надлежните одамна имаме кренато раце). Можеби треба да се проба ова.

Си пиел, си бекријарел, си заглавувал со некого секој викенд (ден), и одеднаш без никаква посебна причина истиот тој човек решава дека дома му е покомотно или дека имал серија за гледање. Е па Олд Спајс нема да го дозволи тоа, а не треба ни вие. Секоја сличност со реалноста е жална.

Она што е нејасно е како се победува во ова, ако имаш зависност од порно или немаш зависност од порно?

По повод 50 годишнината од објавувањето на Space Odity (50 години, јеботе!), песната доби свеж микс од неговиот долгогодишен продуцент Тони Висконти и нов видео спот, инспириран од Одисеја 2001-ва.  Путуј, мејџоре Томе, овде сè по старо.

Ако ова не ве откаже од фрлање влажни марамици во ВЦ шолја слободно продолжете, ич да не му ја мислите. Видеата се од проблемот што го имаат во Британија, што значи дека кај нас е само полошо.

Поентата е - и проект со буџет од 365 милиони долари, ќе има грешки и пропусти. Исто така држи и поентата дека ти веројатно не работиш на проект во кој учествуваат доволно луѓе за да извршат државен удар во која било држава, па немој да се тешиш со нив.

Линијата меѓу забавно-романтично изненадување и доживотно жигосување и трауматизирање на една личност не е и никогаш не била ни тенка, ни нејасна.

За ова ти треба билдер, ама не некоја жилава смешка од човек туку прописно набилдано брдо од мускули, и секако храброста од насловот. А, да, и налепница една, ќе видиш зошто.

Коњ, воспитан, питом, послушен. Туристи, американски, дебели, упорни. Поука, веројатно ќе им потрае.

Човекот пред некое време од Јутјуб доби плакета за 10-милионитиот претплатник на неговиот Јутјуб канал. Сите ние за благодарам добивме рецепт за спектакуларен бургер од Рамзи.

Репрезентативен вод белгиски армиски кадети чекорат војнички марш и на непријателот крвта му се замрзнува во жилите. Кинезите го гледаат ова и си викаат, добро бе, ние глупи сме толку да вежбаме?

Конкретниот стеротип е возач на џип, плус тој возач да е жена. Видеото е од едни скали во Ванкувер.

Неодамнешна анкета во Британија покажува дека 12% од британските мажјаци (веројатно истите се силат и дека „па јас од тука би дал гол“ во Премиер лига) се под впечаток дека можат да ѝ земат поен на Серена Вилијамс. Како што ќе забележиш од овие кутриве примероци кои успеале себе си доволно да се охрабрат за да излезат на терен против Серена, прво треба да и вратиш серва за да и земеш поен.

Под водство на искусни супертв изори, којзнае колку играчи од светот цели 9 години ја реконструирале Средната земја од Господарот на прстените. Деталите се неверојатни.

Со децении официјалната воена доктрина на САД налага дека земјата треба да има доволно воена сила за да води две симултани војни против кои било други две големи воени сили. На почеток не е така.

Кромид да ти се чувал во хулахопки, пресечена лубеница во цедалка, зелена салата и млад кромид во мокра крпа, ловорови листови да се ставаат во брашното против бубалки, доматите да се чуваат свртени надолу и уште неколку трикови како на храната да ѝ го продолжите рокот на траење во овие топли денови. Хулахопки бе?!

Пошто популарната апликација не може да знае кој колку пластични операции ќе направи, добра е кај луѓе како Иан МекКелен (Гандалф) и Морган Фриман ама затоа тотално е утка кај Доли Партон, срцката која има кажано: „Знаете ли колку скапо ме кошта да изгледам вака евтино?“ Одиме со неколку фото примери.