Има и луѓе што се пресоблекуваат исклучиво заради комфор, без да се опседнуваат со бактериите и гадотиите што се внесуваат од надвор.
Постојат одредени професии каде што се препорачува задолжително пресоблекување -луѓе што работат во здравство, во продавници, по пазари и ресторани. Не дека пресоблекувањето комплетно ослободува од бактерии, но сепак е разумно да се претпостави дека облеката што се носи на одредени работни места е поподложна на нив. Патем, на полиестер, бактериите можат да преживеат и до 206 дена, на други ткаенини до 90, па да не се занесуваме дека можеме да бидеме стерилни.
Голем удел во чистотата на алиштата има и хигиената на кожата. Не се само бактерии, облеката, косата и кожата собираат полен, мувла и издувни гасови, па едноставно е неразумно да си седиш во облеката што можеби ги прибрала од некаде.
Нема многу истражувања што споредуваат придобивки од итно пресоблекување, но принципот има смисла, особено во урбани средини. А навиката за „алишта за по дома“ е лесна за одржување и помага во одржување на чист дом, иако без лична хигиена џабе се трудиме.
Експертите се согласуваат дека миењето раце и лице е сѐ уште најуспешниот начин да се заштитиме од контаминирање со вируси, а ако ве мрзи да се пресоблекувате кога ќе влезете дома, барем обрнувајте внимание на најгадните предмети - торба и телефон. Тие знаат да носат бактерии од оставање на под во јавност, шанкови и јавни тоалети, па би било фино редовно да се чисти дното на ташните и торбите што ги носиме и да се пребришува телефонот.
