Не сте задоволни од висината? Изгледате како ступче за велосипедска патека во Скопје кога ќе облечете кратки панталони и чизми? Без гајле.
Постојат вештачки папоци, се продаваат и можете да си ги залепите некаде погоре над вашиот роден папок и визуелно да ги издолжите нозете.
После тоа е доволно само да ја кренете сукњата или панталоните повисоко, и ако не се чувствувате глупо, да излезете и да ги прошетате новите, визуелно издолжени нозе.
Трендот прво почнува во Кина, па метастазира во САД, преку иБеј - за само 8 долари од лист полн тетоважи од папок. Има дури и пред/после фотографии.
И ТикТок е опседнат. Од таму воскликнуваат дека „секоја убавица има два папока“и изговорот е дека, иако можеби „изгледа будалесто“, сепак е поевтино од процедурите за хируршко издолжување на нозете. Во јуни годинава, уморен дека го вреѓале дека е низок, еден Динзел Сигерс од Атланта, Џорџија има дадено 80.000 долари на операција за издолжување на нозете и вели дека сега се чувствува како нов човек.
Ако светот ни се распаѓа по шавови, ова ли е папокот на светот?
