Балман значи, си направи нова дружина од супермодели, со тоа што - не се вистински.
„Секој е добредојден да се придружи на војската на Балман - само треба да го дели храброто чувство за авантура на нашите нови виртуелни икони, Марго, Шуду и Жи кои одразуваат убавина, опасен стил и самоуверена моќ,” пишува на официјалниот сајт.
Моделите, што не се ни забележува дека се дигитални, ги создава фотографот Камерон-Џејмс Вилсон, кој уште во 2017-та ја направи Шуду. Облеката ја креира CLO Virtual Fashion, чија специјалност се хипер-реалистичните 3Д симулации на облека.
Шуди е позната како „првиот дигитален супермодел во светот.” На Инстаграм има речиси 140.000 следачи и веќе ја има по кампањи на Фенти и на фотосесии на Women's Wear Daily и Cosmopolitan.
Популарноста на виртуелните модели расте - Лил Микела, ликот креиран како проект по дигитална уметност има над милион следачи на Инстаграм и носи висока мода и промовира повеќе добротворни организации.
Креативниот директор на Балман, Оливер Рустинг е познат по неговиот стил и фокусот да ја донесе модната куќа на врвот на дигиталната ера. „Треба да се менуваме. Да туркаме граници. Да зборуваме за новата генерација. Да ја направиме модата релевантна,” вели тој во едно видео за Њујорк Тајмс од минатата година.
На почетокот на годинава, Рустинг го направи My City of Lights, еден проект со виртуелна реалност кое имаше цел да им помогне на луѓето да го разберат неговиот креативен процес. А крајната цел на Рустинг му е да направи мост меѓу модата и технологијата.
