Но, јас не верувам во нивната среќа, мислам дека се исто несреќни како нас, освен што ние сè уште зборуваме за тоа понекогаш - но тие само викаат дека сè е во ред, дека сè е фантастично. Ми оди на нерви тоа секојдневно, а за жал, режирањето е секојдневен живот. Мораш да поминеш половина година на едно место, во една земја за да направиш нешто. А ако сум соочен година дена со луѓе што велат дека сè е фантастично, не би можел да го поднесам тоа.
Се плашам од Америка. Секогаш кога сум во Њујорк имам чувство дека ќе пропадне и паметот ми е само како да го избегнам тоа кога ќе се случи. Тоа важи за сите места во Америка. Нема толку луѓе и толку бучава во Калифорнија како во Њујорк, но има многу коли на сите страни и многу се сомневам дека во нив се возат Американци. Си викаш, кој е внатре? Отсекогаш сум имал впечаток дека тие коли сами се возат. Затоа сум просто исплашен од таа земја и секогаш имам чувство на дефанзивност кога сум таму. Сум бил и во мали провинциски места, и пак се плашам и секогаш бегам. Се затворам. Бегам во хотелот и обично спијам. Ако успеам да заспијам, не заспивам лесно како порано. Но ако успеам, тоа правам.
Кога Американците ќе ме прашаат како си, им велам „така-така“. Веројатно помислија дека ми умрел некој. А јас бев само преморен од летот, затоа што патував седум часа и не ми беше баш добро. Но, доволно беше да кажам така-така и тие веднаш да помислат дека нешто трагично се случило. Не можеш тука да кажеш така-така. Мораш да кажеш добро, или многу добро. Најоптимистично што можам да кажам е „уште сум жив“. Затоа не сум створен за Америка. Второ, не дозволуваат да влезе режисер во собата за монтажа, барем не во големите студија. Режисерот го режира филмот, тоа му е работата. Таму, еден пишува сценарио, друг режира, трет монтира. Немам сомнеж дека еден ден ќе режирам нечие друго сценарио што ќе биде многу подобро од моето, и многу поубаво и поумно. Но, никогаш нема да се откажам од монтирање. И од таа причина не можам да одам во Америка. Се разбира, не можам да одам затоа што не дозволуваат цигари, па секако има доволно причини што не ме привлекува.
