Откриваат дека сите имаат проблем со лоша хигиена. Потоа со мрзливост и „нонстоп нешто му треба“. Не им се бивало во врска на далечина, не сакале луѓе што не ги бива во кревет. И без смисла за хумор - не може. Стандард.
Истовремено, истакнуваат специфичен дел од студијата, направена со помош на 295 студенти, и им рекле да штиклираат што им е дил-брејкер од 49 опции. Повеќето избори им биле слични со општите. Но, сепак, на 10-то место се нашло нешто ново - „со предрасуди/расист“. Во јуни, неколку месеци пред ова, Доналд Трамп објави дека ќе се кандидира за претседател. Во тоа време никој не мислеше дека ќе победи. Пет години подоцна, многумина од испитаните се дваесет и кусур годишни луѓе што си бараат сродна душа, а дил-брејкерот „расист“ станува многу поважен.
Линдзи Метселар е основач на популарниот подкаст за врски и профил на социјални мрежи „Се сретнавме во Акме“ и позната е по анкетите на Инстаграм каде што се гласа со „да“ или „не“, „проблем“ или „црвена линија“. Таа вели дека сѐ почесто ја прашуваат кога е паметно да се почне да се прашува дали човекот со кој си на дејт го поддржува Трамп. И пред да помислите дека се тоа глупости, анкета од април покажува дека 71 процент од поддржувачите на демократите не би биле во врска со поддржувач на Трамп. „На пример во мојот случај,“ додава, „Ако јас сум со некој со голема онлајн платформа и многу следачи и постира сториња секој ден, а притоа не објавува ништо за БЛМ? Тоа би ми било црвена линија.“
Понатаму, со сите парадокси на пандемијата доаѓа уште еден критериум, па се појавуваат и дилеми со „на каков дејт би оделе - виртуелен, социјално дистанциран со маска или социјално дистанциран?“
Метселар исто така вели дека неодговорното однесување во пандемија често се појавува како проблем за нејзините следачи. „Луѓето не сакаат луѓе што не се дистанцираат, или уште полошо - не се дистанцираат, а живеат со родители, баби, дедовци и ги ставаат на ризик.“
Порано се викаше дека спротивностите се привлекуваат. Дали е вистина тоа, во една поларизирана и измачена 2020, каде што не се знае кој пие, кој плаќа? Каде што избегнување конфронтација и „согласување да не се согласиме“ значи дека имаме системски и институционални двојни аршини? Сепак, страшно е да не носиш дезодоранс, но тоа никого не убило. А за маска не можеме да го кажеме истото.
