Вести › Набрзинка

Запад го пушта низ вода Зеленски и Украина за Северен тек

15 август 2024

Веднаш штом беше објавено дека Германија издала потерница по украински нуркач осомничен за дигање во воздух на цевководите на Северен тек (овде), Волстрит журнал излезе со детали како е изведен овој индустриски тероризам и кој стои зад него.
Саботажата во 2022 година го одобрил највисокиот врв во Киев, вклучувајќи го и претседателот Зеленски, тврди весникот потпирајќи се на украински воени извори.
Операцијата за дигање во воздух на Северен тек била изведена под супервизија на главниот командант на украинската војска во тоа време, Валериј Залужни, иако во меѓувреме Зеленски се предомислил и барал планот да се стопира.

извор

Трамп очекува средба со Путин, Зеленски ќе почека

7 август 2025

Американскиот претседател Доналд Трамп е убеден дека би можел да се сретне со рускиот Владимир Путин веќе во текот на идната недела, а дури потоа би им се придружил и украинскиот Володимир Зеленски, во обид да почнат преговори за крај на војната.
Трамп го изложил својот план во телефонски разговор со Зеленски и со неколкумина европски лидери - британскиот премиер Кир Стармер, германскиот канцелар Фридрих Мерц, финскиот претседател Александер Стуб и генералниот секретар на НАТО, Марк Руте. Не е планирано Европа да има свој претставник на мировните средби.

Кремљ ниту ја демантираше ниту ја потврди најавата за самитот. Путин уште во јануари изрази спремност да се сретне со Трамп „за да разговараат смирено за сите прашања што се од заеднички интерес на САД и на Русија“, но одбива средба со Зеленски.
Оптимизмот на Вашингтон го крена мисијата на специјалниот претставник Стив Виткоф, кој вчера во Москва три часа разговараше со Путин. Нема детали за разговорите, но државниот секретар Марко Рубио изјави: „Можеби првпат имаме некои конкретни примери што бара Русија за да заврши војната“. Тој додаде дека „клучен елемент од било каков договор ќе бидат територии“.

извор

Новиот полски претседател решен да го смени Уставот

6 август 2025

Веднаш откако ја даде свечената заклетва, новиот полски претседател Карол Навроцки најави иницијатива за промена на Уставот со цел да го заштити суверенитетот.
„Полскиот Устав неодамна беше толку многу нарушуван, поради што ние како политичка класа мора да почнеме да работиме на нов Устав, кој би бил спремен за усвојување верувам до 2030 година“, кажа Навроцки во инаугуративното обраќање до Парламентот.
Тој не објасни што конкретно треба да биде променето во Уставот. За секоја промена потребно е одобрување од двотретинско мнозинство во Парламентот. Партијата Право и правда, чиј кандидат беше Навроцки, е во опозиција, но се надева дека претседателот може да ја приближи до мнозинство на изборите во 2027 година.
Како популист што го споредуваат со Доналд Трамп, се очекува Навроцки да блокира многу закони од проевропската влада на Доналд Туск. Навроцки се спротивставува на нелегалната миграција и усвојувањето на еврото и вети дека ќе се спротивстави на секој обид од Брисел да ѝ одземе моќ на Полска.
„Ќе бидам гласот на оние што сакаат суверена Полска, која е во Европската Унија, но е и ќе остане Полска“, порача новиот претседател.

извор