- Во Тафталиџе веќе не остана празно место каде што може да се гради. Јакимовски во новиот мандат му „фрли око“ на Влае.
- Една од првите локации каде што се планирани станбени згради и деловен објект е токму локацијата во која ја славеше изборната победа – „Кино Влае“. На местото на дрвеното кафуле ќе се изгради скалест комплекс, односно една зграда од десет и една зграда од осум ката, кои ќе бидат споени со трговски центар.
- Земјиштето и објектот се во сопственост на старите деловни партнери на Јакимовски кои учествуваа во бетонизацијата на Тафталиџе.
- Доналд Трамп воведе тарифи од 50% за увоз на стоки од Бразил, за да изврши притисок врз властите да го запрат прогонот на неговиот политички сојузник Жаир Болсонаро.
- Бразилскиот Трамп, како што го нарекуваат Болсонаро, е на суд поради планирање државен удар за да остане на власт по поразот на изборите во 2022 година.
- „Ова судење треба да го нема. Тоа е лов на вештерки што треба да заврши веднаш!“, порача Трамп на својата социјална мрежа.
- Бразил е една од ретките земји со кои САД немаат трговски дефицит. На заканата со тарифи од Трамп, која би се применувала од 1 август, претседателот Лула да Силва одговори дека Бразил ќе возврати со реципрочни мерки.
- „Постапките против оние што планирале државен удар се во надлежност на бразилското судство и не се предмет на мешање или закани што ја нарушуваат независноста на националните институции“, изјави Лула.
- Трамп синоќа најави и повисоки царини за уште седум други земји и објави дека тарифите од 50% за увоз на бакар од целиот свет ќе важат од 1 август.
- Со 461 глас за, 121 против и 107 воздржани, Европскиот парламент го усвои извештајот на Томас Вајц за напредокот на Македонија, но откако од документот беа отфрлени зборовите „македонски идентитет“ и „македонски јазик“.
- На отстранување на сите референци за македонски идентитет и јазик инсистираа трите најголеми политички групи и европратеници од Бугарија и од Грција.
- Документот на европратеникот од Австрија ги опфаќа клучните предизвици на Македонија на патот кон ЕУ и препораки за напредок во владеењето на правото, борбата против корупцијата, реформата на јавната администрација и зајакнување на демократијата.
