Вести › Набрзинка

Унгарија се повлекува од Меѓународниот кривичен суд

3 април 2025

Унгарија објави дека се повлекува од членството во Меѓународниот кривичен суд, на денот кога во Будимпешта пристигна израелскиот премиер Бенјамин Нетанјаху, по кого МКС објави потерница поради воени злосторства.
Судии од МКС во ноември објавија дека има основани сомневања дека Нетанјаху има кривична одговорност за воени злосторства и злосторства против човештвото, поврзани со војната на Израел со Хамас во Газа.
МКС има надлежност да гони лица обвинети за геноцид, злосторства против човештвото и воени злосторства. Членките се обврзани да ги приведат лицата по кои Меѓународниот кривичен суд објавиле потерници.
Премиерот Виктор Орбан го покани Нетанјаху откако беше објавена потерницата, истакнувајќи дека таа „нема ефект во Унгарија“.
Унгарија е еден од основачите на Меѓународниот кривичен суд, кој сега е прифатен од 125 земји. Неговата јурисдикција не ја признаваат САД, Русија, Кина, Израел и уште десетици земји.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор