Вести › Набрзинка

Трамп укина препораки за 6 вакцини за деца

11 август 2026

Претседателот Доналд Трамп потпиша извршна наредба со која повикува на намалување на бројот на препорачани вакцини во детството на 11 од сегашните 17.
Вакцинирањето против ковид-19, сезонски грип, ротавирус, хепатитис А, хепатитис Б и бактериски менингитис сега ќе се заснова на „заедничко клиничко одлучување“ меѓу родителите и лекарите, наместо овие вакцини автоматски да се препорачуваат за сите деца.
„Со оваа ажурирана препорака САД конечно се усогласуваат со другите напредни и развиени земји низ целиот свет. Уште поважно, нè усогласува со здравиот разум и знаењето“ изјави Трамп.
Наредбата исто така повикува комбинираната вакцина против мали сипаници, заушки и рубеола (ММР) да се подели на три посебни вакцини за секоја болест. Вакцината ММР моментално не е достапна во САД во три одделни дози.
Распоредот на вакцините за деца го одредуваат сојузните држави, а улогата на федералната влада е ограничена на препораки. Заклучно со јануари годинава, 28 сојузни држави повеќе не се потпираат на федералните препораки за вакцинација.

извор

Психијатар за осомничениот сериски убиец: Глуми лудило

31 август 2026

Во Куманово продолжи судскиот процес против осомничениот сериски убиец од Старо Нагоричане на кој му се суди за четири убиства и два обида за убиство.
По службена должност му беше доделен адвокат, откако на претходното рочиште адвокатот му го откажа полномоштвото зашто спротивно на неговите совети тој не призна вина.
За однесувањето на обвинетиот на првото рочиште (се смееше и гледаше во плафон), невропсихијатарот Мице Дудучки вели: „Се работи за личност која во просториите на судот покажува псевдодементно однесување, а ние психијатрите тоа го нарекуваме Ганзеров синдром, односно глумење лудило, со цел – “не се сеќавам“.
Тој нагласува дека постоењето психопатологија само по себе не значи дека едно лице е непресметливо.
„Јас сум поборник на смртна казна кога се работи за убиства со умисла, посебно од користољубие“, вели Дудучки.

извор

Повторно се отвора истрагата за мазутот во „ТЕЦ Неготино“ поради слабости во вештачењата

31 август 2026

Вишото јавно обвинителство ја укина одлуката на обвинителката Катерина Коларевиќ која ја запре истрагата за случајот ,,Мазут во ТЕЦ Неготино“, што значи дека предметот е вратен назад во Обвинителството за гонење на организиран криминал и корупција на повторно постапување.
Истрагата за овој случај, тежок 167 милиони евра, почна во март 2025 година. Под истрага беа 13 лица и една фирма поради сомнежи за злоупотреби, незаконски договори и анекси и перење пари во постапките за набавка на мазут за потребите на ТЕЦ Неготино, спроведени во услови на енергетска криза во периодот 2021-2023 година.
Во фокусот на истрагата беше фирмата РКМ која го добила тендерот и нејзините сопственици Ратко Капушевски и Ерџан Сулкоски. Меѓу осомничените беше и сопственикот на Пуцко Петрол, Асмир Јахоски, син на пратеникот на ДУИ, Исмаил Јахоски. Сулкоски е поранешен вработен во Пуцко Петрол, а потоа стана еден од сопствениците на РКМ заедно со Капушевски.
Во истрагата беше опфатен и екс директорот на ЕСМ, Васко Ковачевски кој е во бегство и се бараше со меѓународна потерница за случајот Адитив. Опфатен беше и уште еден поранешен директор на ЕСМ, Адријан Муча, пишуваат колегите од Колегиум.

извор